Mit diesen Zeilen begrüssten wir auf der Geburtsanzeige unsere zweite Tochter. Es ist jeden Tag ein Zauber sie bei uns zu haben. Wie schon bei der ersten Tochter möchte ich hier den Weg zu diesem kleinen Wunder schreiben; Es ist in Mundart verfasst da ich so einfach besser schreiben kann.
Der Weg zu dir:
Spoiler:
So simer am Morge am siebni igruckt und de hets zersch mal es CTG und en Untersuech gäh. CTG isch perfekt gsi und lut em Untersuche de Muettermund 2cm offe. So hemer nach em 8i döffe is Gebärzimmer zügle won ich verkablet worde bin mit CTG und Wehetropf. All 15 Minute het mer Dosis vom Mittel gsteigert und vo Beginn weg hani Wehe gha. Sind aber sehr guet ushaltbar gsi, eigentlich nur es Zieh im Buch so wienis sit Wuche kennt han. Ha mi aber druf igstellt das es länger chönt gah. Din Papi und ich hend eus Ziit vertriebe und so isch es denn Mittag worde. Da sind so langsam Wehe chli meh worde und hend au in Rugge usgstrahlt. Din Papi het mer ab und zue s’Chrüz massiert und spöter hani de no en warme Wickel übercho und sogar no bitz chönne döse.
Am eis bini de unterrsuecht worde, 4cm. Ha mer eigetlich chli meh erhofft aber immerhin. Ha det au klar gseit ich welli nonig das mer Fruchtblase ufmachi welli chli Schiss gha han das denn Wehe viel heftiger werded. D’Oberäztin isch de no chli cho schwätze und het gmeint eigetlich hetti mer scho chli chönne vorwärts mache und Blase uftue. Ha de gseit sie chönn susch i 1-2h cho und das mache. Mer hend no gwitzlet obs Baby no am Tag chunt oder erst wenns dunkel isch. Ich han uf dunkel tippt, din Papi het gmeint bi Tag und d’Oberärztin het gmeint sie wür susch gern wenn sie Firabig het no cho gratuliere.
So am halbi zwoi sind de Wehe langsam chli meh worde und ich ha gfunde ich wür susch gern es Bad näh. Also hemer das mal afa parat mache und ich bi witer uf em Ball gsässe und ha Wehe um Wehe veratmet wo langsam doch immer heftiger worde sind. So um die zwei hani de doch afa jammere es tügi so weh ich welli lieber en PDA statt id Badwanne. Ha de ufs Bett müsse und bim Untersuech hets gheisse MuMu vollständig nüt mit PDA oder Badwanne das Baby chämi jetzt.
Das isch de de Moment gsi woni churz chli Panik übercho han und Schiss gha han es giech wieder solang wie bi de erste Geburt (det isch es no 3h gange nachdemi vollständig gsi bi). Ha de no es Schmerzmittel übercho, wobi öb das no öpis bracht het hani zwifel gha. Und de isch es scho losgange mit de Presswehe und min Körper het einfach funkioniert. Ha de no müsse 2mal uf de Site chli presse und de zrugg ufe Rugge. Denn isch es ruckzuck gange, 3 heftigi Presswehe und du bisch dagläge zwüsche mine Bei. Ich has gar ned chönne glaub und immer wieder gfragt ob alles guet isch. Du hesch aber grad afa schreie. Ha au ganz ungläubig gfragt ob sie au sicher ned gschnitte hend, nei nüt hegeds gmacht ich hebi das ganz elei gschafft. Ha de nur no brüelled us Froid, Erliechterig und Dankbarkeit. D’Hebamme het gmeint ich sell dich doch selber ufenäh aber für das het mer Kraft gfählt. So bisch du i mini Arme gleit worde und ich ha dich usgibig chönne knuddle.
Einfach unglaublich das du so schnell zu eus cho bisch!
Chlini Prinzessin - 16.11.2012 14:44 - 3130 gramm 49 cm
Ziit nachher:
Spoiler:
Hier noch der Link zum Bericht unserer ersten Tochter deren Geburt doch 180 Grad anders war.
http://www.swissmomforum.ch/viewtopic.php?f=21&t=133886
