Frühlings-Kinderwünsche - wir haben's geschafft

[black_key]

@hunny: sie hed eus bim erschte termin über die teschts informiert. da mier ihre aber denn nüt meh gsäit hend dänk ich ned das sie die bluetteschts laht la mache. ich nime a bluet wird sowiso bi jedere untersuechig gnoh? oder wie isch das bi euch?

[black_key]

@hunny: ok, ich lüüte denn endi wuche mal a und frage nache. wott sowiso mini SD wert wüsse.
danke trotzdem
gahts bi dir besser mit de übelkeit?

[black_key]

@hunny: mmh chueche isch doch öpis feins aber ich verstah di, ha au par sache wo gar ned gönd. wird mer scho schlecht wenn mer nur devo redt
susch gahts mer guet. büchli gseht mer scho chli, aber ebe ich isse im moment au ned grad wenig....

[wolke7]

Hallo zäme

Ben höt morge bim fa gsi...ben fascht gstorbe vor angst ond han eigendli au met em schlemmste grächnet. Han öber s'wochenänd chum no ahzeiche gha ond han denn s'gfühl gha ich chön mich met eme voll fett positive sst beruhige- nor blöd das dä dütlech schwächer gsi esch als i de 5ssw den am obig weder rächt vell bluet...das chan in de ss eifach ned gso d si?! Aber was söll ich säge...s'herzli schlot wie verockt ond mis wörmli esch schön gwachse so wies sött! Ich freu mich so sehr ond doch chömed scho weder neui ängst bi mer uf- ob man ich muess minzäme riese so chani ned 9 mönet wieter mache!

@hunny: das zieh ond drocke hani bi minere tochter wie au jetzt ganz vell gha, sogar scho vor em usbliebe vo de tr.

[gerbera]

@wolke: super, gratuliere zum schlagende härzli, ize hesch di erschti grossi hürde scho gno! So schön!

@black_key: bi ou verfrässe, ha scho 3 kg zuegno... Das söt de nid so witer ga, aber wenn me haut immer hunger het... Dänke mau, si hei eifach ds übleche teschtet im bluet, mir hei ämu explizit müesse säge, was mr wei u was nid.

@hunny: das zieh hani ou, d gebärmueter muess sech haut usdehne... Wenns schlimm isch chasch mau probiere es magnesium ds näh, aber nid mitem isepräparat zäme, das verhinderet gägesitig d ufnahm, am beschte ds einte am morge u ds andere am abe...

@me: nid viel neus, muess ize de mau ds vitaminrezäpt ga ilöse, wo dr fa mr gmacht het... U bi mr chli am überlege, winis im gschäft wot säge, heit dir das alli scho gmacht?


Gesendet von iPhone mit Tapatalk

[black_key]

@hunny: ja das stimmt
ich ha das zieh ab und zue au und bi mier isch es würkli fascht glich wie ami vor de TR. has ja am afang par mal mega starch gha, mini FA hed mer gsäit das sind d bänder wo sich dehned. muesch der also kei sorge mache

@wolke: hey wow so schön, tolli news vo dir!! wie wiit bisch denn jetz? muesch di schone wäg de bluetige?

[black_key]

@gerbera: ja ich muess jetz würkli au chli luege aber ich halts amig würkli fascht ned us weni so fescht hunger han...
ja ich dänk au das mier das explizit hetted müesse säge.

im gschäft han ichs au noni offiziell gsäit. es par wüsseds scho wills mich konkrekt druf agsproche hend. aber bi de andere weissi ebe au noni wie säge...

[wolke7]

Danke euch...je länger ich dröbert nochedänke om so meh glaubi au dra das es jetzt eifach nor guet chont! Ben bi 6+3 ond jo muess secher biz schone, wobie ich gmerkt han das da ned de hufe brengt. Er het den no en donkle fläck gseh wo äntwäder en zyste seg ( verschwendet meistens sälber weder) oder en zwillig wo sich ned wieter entwecklet het...ben jo gspannt wie das wieter goht!

[Awe]

Hoi zäme

@wolke: wow so schön zlese esch met dim würmli alles i ordnig. Freut mi riesig för dich ond wönsch der witerhun alles gueti ond vell zueversicht.

@Hunny: ond wie händs reagiert wods gseit hesch? Das met de bänder esch ganz normal, einisch merkt mers stark ond de weder gar nüt. Schön esch met de übelkeit chli besser ond gratuliere no zum tolle untersuech

@gerbera ond black_key: ich han am afang au so hunger gha ond zwischenmahlzite müesse iführe. Han au grad am afang zimmli schnell 3 kg zuegno, aber ich han au uf mi körper glost ond wenni hunger gha ha au gässe. Mer cha jo chli luege was mer esst. Es get au weder phasene wo mer e monet lang nüt zuenimmt, das esch ämel bi mer so gsi ond das öberd festtäg esch doch schön gohts eu guet i de ss, gnüsseds.

@me: ich bi grad mis süesse möckli am stille er esch soo herzig bim trinke. Er esch emmer no flissig am zueneh, bin secher wenn dhebamme ehn öbermorn dued wäge escher scho öber 3 kg hött semmer chli dusse gsi. Bi emmer nochli vorsichtig ond trou mi ned rächt use aber hed richtig guet do. Han chli im garten gschaffet. Go ässe döfemer all mittag zo de s chwiegereltere wie scho vorher woni no gschaffet ha. Mer händ jo en buurehof ond sie wohned näbedra. Bin so froh um die entlastig ond sie freut sich riesig chömemer witerhin öbere go ässe. Mache mer jetzt kei stress ond koche denn ersch sälber wenn mer chli en alltag gfunde händ.
Wönsch eu allne no en super tag.

[black_key]

@awe: ja das stimmt, ich muess eifach luege das mini zwüschemahlziite gsund sind, denn chunnt das scho guet
jöö so herzig das euche chli so flissig am zueneh isch und schön trinkt super das vo de schwiegereltere unterstützig hesch das isch sehr vill wert.

[black_key]

@hunny: jöö das isch ja ganz en herzigi idee da glaubi das s gotti freud gha hed
mier hend noni gfrogt. bi eus isch chli speziell... ich ha zwei schwöschtere und mini ältischt schwöschter isch mini trauzügin gsi. sie redt scho uu lang vom gotti si bi eus (no vor mier ghürate gsi sind) und ich ha ihre immer gsäit das lueged mer denn a wenns sowit isch, für mich chönnts au grad so guet mini ander schwöschter si. jetzt wos aktuell isch redt sie natürlich umso meh devo und für sie isches scho klar da sie s gotti wird si. ich ha sie aber nie agfragt und ha ihre das au scho gsäit, das ich ihre das nie versproche ha oder so... aber ebe mini ander schwöschter isch mier genau so wichtig und sie würd sich genau so drüber freue...

[gerbera]

@awe: das tönt ja mega! schön trinkt eue chlii so guet und nimmter so guet zue. Isch sicher ou e erliechterig für di! u das mitem Mittagässe tönt ou super, i dänke ou, dassi mi de am Afang mängisch zu de Eltere darf ga verpflege am Mittag.

@black_key: gseh das ou so, i ertrage eifach hunger grad gar nid im momänt… U versueche scho ou viel gsundi sache ds ässe, ou wenns zwüschedri haut glich schoggi muess si Finde das mit dire schwöschter chli schwirig, es isch ja scho fasch so, dass si das erwartet, dass si gotti wird? oder hani das falsch use gläse? mi würd das gloub chli stresse… heis de beidi schwöschtere glich guet mit chind? das findi ou no e wichtige faktor… Und wenn lieber di anderi Schwöschter wettisch frage, chasch dr ja immer no überlege, ob di anderi bim zwöite chind wettisch?

@hunny: mir hei gotti/götti ou scho gfragt, das isch ou e mega rüehrende Momänt gsi! findi super, bi sehr zfride, und hoffe es chöm de guet, finde gotte/götti e sehr wichtigi bezugsperson, wenn är/sies guet macht.

@me: i ha mi geschter abe chli gstresst mit Chinderwage-recherche. Finde das so mega schwirig, gloube muess de eifach mau ines grosses baby-huus und alli mau usprobiere… usserdäm si mr grad am überlege, ne occasion ds choufe, de müessts ja de ou no eine gä, wo mr gärn hätte… heit dir euch da scho gedanke gmacht, oder bini wieder mau viel ds früeh mit de überlegige?

[Gini]

Awe: Schön dass di Chili so guet gedeiht! Findes e super Lösig, dass ihr chönd zo de Schwigis Goge ässe. Do würdi mir au kei Stress mache onds eifach gnüsse.

Gerbera: Mer händ bi de erschte Tochter zimli spot (öpe so im 8. SS Monet) en Chinderwage a de Börse kauft. Bi sehr zfriede, es isch en Hartan, en Drürädrige. Do mir sehr vill unterwegs send im Wald mitem Hund, isch dä grad ideal für das. Dänke s chonnt au chli uf d Nutzig druf a. I ha de Wage täglich sicher 2 mol füregnoh ond er het vill mit gmacht, isch aber immer no top zwäg. Ou s Zugfahre isch immer guet gange demit.

Me: Ha grad festgstellt, nor no 3 Wuche. Morn dörfi die Chli abgeh ond wett nochli s eine oder andere mache fürs Baby. Sett no Bettbezüg wäsche, de Stubewage mol füre nä ond uf Fordermann bringe. Am 28 hani denne CTG. Bi gspannt.


E schöne Nomi euch allne

[black_key]

@gerbera: ja zwüschedure dörfs au mal öpis süesses si
nei das hesch du scho richtig gläse, sie erwartets scho das sie gotti wird. mini ander schwöschter isch scho gotti ide verwandschaft und drum find sie sie hed jetzt meh aspruch druf... ich dänke es würdeds beid genau glich guet mache und es hend au beidi freud a chind (sind au beidi single....). ich triffe mini ander schwöschter am wuchenänd und rede mal mit ihre wie sie das gseht, öb sie enttüscht wär. aber ebe, mier wänd ja wenn möglich meh als 1 chind und denn wär das "problem" au glöst

wägem chinderwage simer am wuchenänd mal spontan ines baby gschäft eifach chli go luege, aber mer hend eus au noni berate la. es isch u schwirig find ich will mer ja no kei erfahrig hed. au d priise sind ja au total unterschiedlich...
min maa hed nur uf d räder gluegt eus isch scho wichtig das mer au mit dem denn id natur cha und ned bi jedem stei stecke blibt.

[gerbera]

@gini: Wahnsinn wi schnäll dasses geit, när hei mr de vor Oktober gar ke schwangeri meh, wo termin het, sondern alles nur no froue, wo schon chind hei… Hoffe chasch dä tag richtig gniesse und usnütze!

@hunny: da bini ja erliechteret! Chinderzimmer choufi wahrschinlech ds Züg einzeln, also kes Zimmer an sich… Bi haut ou total heikel, dr Wage söt nid ds schwär si, liecht zäme ds falte, Landstrasse und Waldtouglech, liecht zu agä, gueti Brämse, und wetti eine, wo me ds sitzli cha i Fahrtrichtig und gäge Fahrtrichtig iboue, je nachdäm was grad gfragt isch oder wi d sunne steit. Ah ja u e guete Sunneschutz, und und und

@black_key: i finde dr Druck mit de Erwartige vom umfäld sowieso öppis vom schwirigschte, so wi mini mueter, wo gfragt het, ob mr de ds gschlächt wei wüsse, und ig ha gfunde, ja das scho, aber i wiess no nid ob mrs verzelle, und de het si erklärt, si als grossmueter heigi ds rächt druf, das ds wüsse… villecht bini dert düre ou chli schwirig, aber i finde haut eifach, im momänt het no gar niemer arächt uf das chind, das isch mim gg sis und mis, und süsch ghörts grad no gar niemerem. U vorallem wenns so fordernd wird, hani amigs extrem müeh… Aber wenns für di sowieso ok isch, dass dini schwöschtere gotti wärde, de ischs ja ou nid so schlimm.

[Awe]

@gerbera: chani verstoh dass di da stresst. Bi mer send zum glück alli sehr zrugghaltend gsi ond händ au nie agfange ergendwelchi tipps geh. Mis mami ond schwiegermami händ beid 3 kind gha ond sie händ au uf die sprüch vo anderne chöne verzichte ond drum möcheds das bi mer au ned. Es esch jedi frau ond jedes chind so individuell, do muess mer eifach sälber usefinde was srichtige esch. Ond susch muesch halt chli notlüge. Seisch de halt eifach ehr wössed ned wases get

Wägem chinderwage hanis au sehr sehr schwierig gfunde. Bin denn wörkli au inen laden, ha mi berote lo ond de grad eine kauft ond bi sehr zfriede. Han en teutonia cosmo, de hed alles debii. Tragtäsche för de afang zums baby inedue ond spöter chamer en sportwagen drus mache wo mer uf beid site chan dreihe, dass denn schline au gäg före chan luege einisch. Mer chönt sogar en isatz dezue chaufe wo mer no de maxicosi chönt ufs gstell amache.

@Gini: wönsche der jetzt scho en schöne endspurt ond freu mi uf babynews

@black_key: findes au schwierig. Aber dassd met desere schwöschter zersch redsch dänki esch ganz e guetli lösig.

[black_key]

@gerbera: gseh das au so, schlussändluch isches eues chind und niemer cha irgendwelchi asprüch stelle. bi mim mami ischs grad umgekehrt, sie cha ned verstah wiso mier s gschlächt wänd wüsse aber ebe schlussändlich müemers so mache wie miers für guet finded

@awe: de teutonia cosmo isch bis jetz au min favorit sinder demfall z fride?

[black_key]

@hunny: ja ich dänkes da hed d verkäuferin rächt, en perfekte wage gitts ned. irgend en chline nachteil hed jede. das mitem gwicht isch sicher au no en wichtige punkt.
han mer überleit öb mer mal in konstanz oder so sölled go luege, weiss aber ned öbs det vill günschtiger isch...

[black_key]

@hunny: super, danke für d info has no halbe dänkt...

[gerbera]

hei froue! i weiss i jammere ize grad chli uf höchem niveau, aber mann i ha e fieberblase becho... u das hani ize würklech ersch einisch gha u zwar öppe vor 15 jahr. so närvig! vorallem bi so face to face termine findi das ize grad enorm unagnähm... ha ize so patches druf gchläbt... aber da findis mega schwirig mitem positioniere... entweder ischs ds tief oder ds höch, und korrigiere cha me ja de ou schlächt...
muess ja eich froh si hani süsch nüt...

ah u ha hüt mi erscht babychouf tätiget, es babybay ha grad mega freud, heis second hand gchouft, und die wonis gholt ha het grad gfunde wenn si de süsch no öppis heig, tüeg di mr süsch de fötele und es sms schicke.... mega nätti lüt mit zwöi chline buebe


Gesendet von iPad mit Tapatalk