Juhu auch wir legen los- die Schwangeren

[alessa]

Wunderbarä guätä Tag

Smack:hahaha das wünsch ich dir nöd mit em pilz, aber ich verstah dich
Ich bin idr 18. Wuuchä und merkä immernonig viel vo miner SS, ussert das der Buch würckli scho langsam form ahnimmt
Ich vertruä jetzt eifach mal (wem au immer) das alles ok isch

Alexa: Willkommä und herzlichä Glückwunsch!!!
Ich druck dir fest dümä, bin mir aber sicher das alles guät chunt

Sarenz: England, känni nonig würd aber au mal gern go, vorallem in südä.
Wärsch gschider no äs paar täg lenger blibä in England, er het hüt wieder sehhhhr heiss

Gnüsseds

[Carina16]

Hoi liebi Fraue

@Alexa: Jupi, gratuliere härzlech zom positive Tescht! Wönsch der en ganz en gueti SS, chond alles guet! Ah jo, d'Signatur fonktioniert wonderbar!

@alessa: Jo mache Sache us Fondant, chasch söscht mol go göggsle wend wetsch www.k-cakes.ch Ha Am Afang vo de SS gar ned chönne die Sache mache, wells mer eifach z'fescht schlächt gsi esch! Aber jetzt machts mer weder rechtig vell Spass. Gebe au Körs, das esch superschön - chani mine Bruef ond mis Hobby metenand verbende Wie gods dim Pelz? Hoffe scho besser; das esch soooooooooooooooooo närvig!!!

@Sarenz: Hihi, das esch aber nätt, dass mer der scho Platz macht Die kleinen Vorzüge des Schwangerseins Hoffe, es esch der nömme so schlächt ond di Körper cha sech chli a Sommertemperature gwöhne Ech gniesses grad, ha eigentlech no gärn warm...

@me: Höt US gha. Esch alles wonderbar! De FA hed grad es Vor-Organscreening gmacht ond eigentlech alles gfonde waser muess gfende... Aber goutet hed sech üses Wörmli noni höt Wett gärn, dass mer nochli a Buebenäme omestudierid Es esch 21 cm ond chli meh als 200g schwär... Wie die Zeit vergeht...

Hebid e schöne Obig!

[Rafa]

hallo zämä

@alessa
bravs büäbli macht jetzt scho was d'elterä möchtäd und zeigt sich schön buäb bliibt meischtens buäb
doof mit däm pilz....hoffä er isch mittlerwillä wieder weg!

@smack
wieso häsch dänn du äs schlächts gfühl? isch öpis vorgfallä das du utro muäsch näh? sorry han ich irgendwiä nöd mit übercho! äs chunt sicher alles guät und diä warterei isch immer so mühäsam...ich säg dir das hört leider no lang nöd uf aber wänn mer dänn mal das chlinä wunder gspührt wirds au chli eifacher! druck dir dä duumä und dänk a dich!

@alexa
herzlichi gratulation zur schwangerschaft....schön bisch bi euis!
oooh das tuät mir sehr leid mit dinärä vorgschicht....das muäss ja ganz schlimm gsi si....umso meh wünsch ich dir jetzt ä super SS und das alles tip top verlauft...häsch äs verdient!

@sarenz
schön gahts dir so guät und hät sich diä übelkeit meh oder weniger verzogä...so sölls au bliebä!

@carina
hey du machsch ja richtigi kunstwerk...bin also au chli go stöbere uf dä homepage....meeeeega cool!
äs freut mich isch im US alles tip top gsi....und ja, wänns nöd wänd dänn wänds nöd

@me
zuckertest han ich guät und schmerzlos überstandä min nüchternwert isch so guät gsi dass ich diä lösig nöd han müässä trinkä und somit dä test nöd han müässä machä...bin also überhaupt nöd verruckt gsi däfür isch mis iiisä im cheller....han jetzt am mittwuch ä infusion übercho....jetzt diä energie wieder ächli zrugg cho....merks also scho chli!
gang morn bis am sunntig an äs polterweekend uf hamburg....freui mich sehr!

machäds ganz guät und bis gli.....

[alessa]

Hallo ihr liäbä

Carina: so schön, diä sachä wo du machsch! Machsch es vollziit oder nebebii? Was hesch dä du ursprünglich glernt? Mich findsch uf FB unter Tortentraum le Petitfour, han jedoch sit eim jahr nütmeh postet da ichs fast nüm machä.


Rafa: Hihihi, so guät mit dim Zuckertest wo glich nöd hesch müässä machä
Das cheibä iisä...aber schön merksch scho chli das dini Energie zrugg chunt.
Hamburg soooo cool, wünsch dir viel spass und gnüss es bim polterä

Me: Bin bim FA gsi und es isch alles tiptop. Dr pilz isch au scho fast weg...zum glück
Han hüt gad vonerä Mitarbeiteri vo üs erfahrä, (sie isch bi dr glich FA) das sie hüt morgä früäh kontrolla ka het, und mä het ihrä au idr ca. 14 Wuchä gseit ka es git en buäb...siehe da es git jetzt äs meitli
Bin natürlich no meh gspannt gsi uf min unteruäch, aber ja bi üs isches immerno äs büäbli

Schöns tägli wünsch ich üch

[Smack]

@ Rafa
Ich han wohl e Zyste wo mit Bluet gfüllt isch. Das chan (mues aber no lang ned) e Fählgeburt uslöse, so d'Wort vo minere FA, drum s'Utro ... Es isch eifach chli, wie sell ich säge, belastender, als went weisch, es isch alles tip top.
Ich tue allig au fescht positiv dänke, hoffe das hilft. Will ich ha jo sus absolut 0 Symptom, wo eigentlich jo super isch, aber äbe eim au öpe cha verunsichere.
Ich ha jetzt über 5 Wuche müsse warte uf de nöchst Termin. D.H ich muess jetzt immerno 2 Wuche warte. Isch denn au grad de ETT - Termin Ich hoffe eifach, dass alles ok isch. Und ich glaube, denn chan ich au eher chli losloh und eifach gnüsse.
Schön mitem Zuckertescht, super Sach Und ich wünsch der es cools Polterweeki in Hamburg! So lässig Heb Sorg

@ Carina
Cooli Sache, chönt grad alli verdrücke
Schön das alles super gange isch, freut mi grad Schöne Seich mit de Buebenäme Mier hend affig 1 so halbe in Peto

@ alessa
Was isch denn das für es truurigs Smilie -> nur wills es Meitli git
Isch doch wunderbar Schön isch alles ok bi eu!

@ me
Do bi eu alles super isch und guet, wett ich eu das eifach noche mache

Händ es schöns Wuchenend!

[Sarenz]

@carina
Bi noni dezue cho dini kunstwerk ahzluege, muesi aber unbedingt auno!
Ich ha wärmi eigentlich au gern, bi e richtigi sunneahbätteri! Aber jetzt ide SS..bitte ned! Goht mer garned guet i dere wärmi! Ha die Wuche einisch elefantefüess gha und nüm chönne laufe! Zum Glück hämer en chüele Teich zum Füess bade!
Schön dass alles guet isch bi dir und dim Würmli!

@rafa
Schön isch de Zuckertest so guet gsi! Da graut mer scho bitz weni das mues trinke! Sber het jo nochli Zit bi mir. Schöns Polterwucheend! Vill spass

@alessa
Schön isch de Pilz besser! Findi irgendwie scho chli früeh ide 14. Wuche.. Aber hauptsach es isch bi dir immerno e bueb!

@smack
Schön gohts au dir guet! De nöchst untersuech chunnt jo gli, de chasch s utro bestimmt beruhigt absetze.

@me
Mir gohts eigentlich au super! Bi grad voll gern schwanger..und chas so richtig gnüsse. Wenn die hitz eifach ned wer!
Mi maa het jetzt ahgfange am obe im Würmli de Tag z verzelle, soo schön! I nüm ganz 2 wuche hämer de nöchst untersuech und hoffe dass mer denn gseht wases git

Wünsch euch es schöns Wucheend

[Deidelina]

Hallo Zämme

Chum momentan nit eso zum ins Forum ine go läse/schriebe.
Mir gspüre s schöne Wetter recht und es lauft au dementsprechend viel.

Aber nur no 2 Wuche, denn gohts ab in d Ferie. Freu mich mega druf.

@Rafa
Schöns Polterweekend und viel Spass.
Freut mi das dr Zuckertest guet usecho isch.

@Alessa
Guet isch dr Pilz scho besser worde.
Hihi, hoffe mir das es e Bueb bliebt.

@Carina
Schön isch bi Dir alles guet und bim Chleine au, das freut mich!
Muess denn nochher au emol uf die Site go luege.
Das mit dä Näme isch doch au eis Zügs.
Meitliname hätte mir scho lang, aber Buebenäme hän mir es paar in dr engere Uswahl.
Wele das es denn würdi wärde, wüsse mir jetzt noni.

@Sarenz
D Wärmi hätti eigentlich scho au gärn, normalerwies. Aber au nit unbedingt in dr ss.
Ha letscht Wuche so gschwulleni Füess gha, isch jo richtig schlimm gsi.
Und jetzt merki au wies langsam wieder afoht.
D Stützstrümpf, göhnd nur bis zu dä Knie, liege daheim in dr Schublade...
Sone Teich zum Füess bade isch natürlich au nit schlecht.
Jöh, das isch wirklich härzig vo Dim Maa.

Im ene Monet hani au dr nächsti Untersuech, Organscreening, und denn hoffi doch au das mä endlich gseht was es denn isch. Bis jetzt het sichs guet versteckt.

@me
Suscht gohts mir recht guet, bis ufs Ruggeweh wo ich sit hüt Morge bitz ha.
Jede Schritt gspüri, und je nachdem au bim sitze/stoh.
Und d Wärmi merki scho au.
Aber suscht alles tip top.

[Sarenz]

@hochschwangeri:
Wie gohts euch so? Goht nüme lang bis s erste Baby us eusem Forum do isch.

[alessa]

Meld mi au no churz...

Deidelina: ohje jetzt scho ruggäweh?! Versuächs mit wärmi, ( bettfläschä )

Sarenz: schön gahts dir so guät. Druckä dumä das ihrs bim untersuäch gsänd was es git.

Me: pilz isch immer nonig ganz weg
Sust gahts mir sowiit guät, bin nur sehr müäd und han sit gester richtigi mamut-füäss am abig

Deidelina und Carina: mir sind ja öpä glich wiit, gspüret ihr üches würmli scho richtig?
Ich han scho sgfühl ka, bin mir aber nöd sicher.

Guät nacht, bruch min schönheitsschlaf

[Deidelina]

@alessa
Ich glaub ha eifach falsch gschlofe, will jetzt ischs scho wieder weg.
Ha jetzt sit gester mini sexy Stützstrümpf a, sind nur bis zum Knie.
Aber s Alege isch au ei Kampf gsi, ha guet warm becho bis ichs agha ha.
Aber dä Füess hets guet do, ok, es isch recht warm gsi.

@gspüre
Jo ich gspürs scho sit ca. 2 Wuche. Isch jo s zweite bi mir, obwohl dr Altersunterschied 5 Johr wär.
Aber immer uf dr rechte site gspür ichs ganz fiin.
Und Ihr, alessa und Carina?

[Wendy]

Hallo zämmä
Melde mich au wieder mal....

Jetzt isch es bi mir endli Ruhiger und ich han Au wieder mal chli Ziit zum öppis schribe und d Poscht erledige....

Nachdem d Bluetige dänn mal fertig gsi sind, isch min Maa für 3 Wuche meh oder weniger Gschäftlich im Usland gsi und ich han nebet äm schaffe,Chind, Hus und Garte (vorallem das viele Wasser gäh am Gmüäs) nüm viel gmacht ussert am Abig is Bett glägä.

Jetzt merk i eifach chli d Hitz, vorallem im Gschäft ohni Klimaalag.

ETT isch au gsi vor guet 4 Wuche und alles in Ornig gsi.

@Chind gschpüre
Mängisch han i s Gfühl das i ganz liecht was Gschpüre aber s chan Au was anderes sie.

Wünsche eui ä gueti Ziit und hoffentlich viiiiel abchüählig bi Glacé und i de Badi....

[Sarenz]

@alessa
Ou nei, Pilz doch noni ganz weg? Blöde seich!

@wendy
Schön sind d Bluetige ändli ganz weg! Du hesch jo demfall rächt öbbis los gha die letschte Wuche!

@gspüre
Ich bi jo eher glichwit wied wendy, aso ca. 1 monet nach euch. gspüre dueni glaub no nüt.. Mängisch zwickts echli, han halt kei ahnig wie sich es baby ahfühlt.. Daher chas au gradsoguet öbbis anders si..aber ich ha jo auno chli zit demit und mach mer noni so grass gedanke drüber.

@me
Han hüt d stützstrümpf füre gholt..ha rächt gschwullni bei becho. Bis jetzt hilfts ganz guet.
Juhuu.. Am Do isch Baby-TV ahgseit hoffentlich zeigts sich schön! Vorallem was so zwüsche de Bei isch..oder au ned

[Blevita]

*reinschleich*

uuuiiii jetzt chömet denn scho die erste Babys ufd Welt, Wahnsinn!!!!!

Lah oi ganz es liebs Grüessli da.

*rausschleich*

[alessa]

Guätä Morgä

Wendy: so schön vo dir z'körä und vorallem das es tiptop gaht.
Ja du hesches ja würklich sträng ka idä letztä ziit, gnüsses jetzt und lahs dir guät gah

Deidelina: Isch dis Ruggäweh weg?
Ich hans nümä ka mit dä gschwullnä füäss, aber stützstrümpf wär viellicht nöd schlecht, wenigstens halbi.
Hesch diä bim FA becho oder Apothek gholt?

Sarenz: So schön...Baby-TV..ich chans amigs chum erwartä
Viel spass!!!

Gspürä: ich bin jetzt idr 20-igsti wuchä, und seltä hani sgfühl das ich öpis gspüräh, isch amigs no recht schwierig zunterscheidä obs luft im buuch isch oder s'Baby

Me: Pilz isch jetzt dä ganz weg...hoffi....
Ich kämpfä im Moment rächt mit dr müädigkeit das nervt richtig, mögä nüt machä und möchti no soooo viel machä.

Gnüssed no das sunnigä tägli bald wird's gwitterig

[Sarenz]

@alessa
Stützstrümpf bechunsch ide regel ide Apothek, die düend der das au usmässe. Gwüssi FA mached das aber au. Chasch der uf jedefall es Rezept geh loh.
Ich han mini vor uii.. Ganz vill Johr selber usgmässe und bstellt (ha d Lehr ide Apothek gmacht), ha immer schochli müeh gha wenns warm isch.
Zum ahlegge sind die bis zude Knü am eifachste..

[Rafa]

hallo zämä

@smack
aah okey...positiv dänkä isch sowieso immer s'beschtä...das machsch du guät! häsch din termin jetzt scho gha oder isch dä erscht morn?

@deidelina
schön gspürs dis chlinä würmli scho....isch halt scho äs schöns gfühl, gäll? und super gahts dim ruggä wieder besser!

@wendy
hey schön vo dir z'ghöre! häsch äs würklich grad ächli streng gha umso schöner isch jetzt wieder ächli ruhä iikehrt...ja ich find d'hitz im Büro au am schlimmschtä!

@sarenz
s'erschtä chind gspürt mer meischtens nöd so schnell, ebä will mer halt au nöd weiss wiäs sich afühlt...das isch dänn bim zweitä natürlich eifacher! ich han mis erschtä i dä 21. ssw gspürt und das jetzt scho i dä 18. ssw! also ebä, ja kein stress
uuuuuuund häts sichs zeigäd?? "megagwundrigbin"

@alessa
müädigkeit isch i dä SS leider meischtens immer wieder äs thema....mich nervts namigs au aber chasch leider nöd viel machä....eifach immer schön eis ums anderä dänn chunt das suuuuper

@me
han hüt au FA-kontrolle gha. die chli liit immer no schön mit äm chopf nach abä...mini FA hät gmeint dass sich di chlinä zu däm ziitpunkt sältä nomal id BEL drehäd. umgekehrt natürlich scho….vo dä BEL id KL! Bin jetzt i dä 30. ssw und sie isch 1453 gr. schwer und 39.4 cm gross, also völlig im durchschnitt luut minärä FA. Han i letschter zyt oft so ä druck nach abä...han das dä FA natürlich grad mitteilt und sie hät churz nomal dä gebärmutterhals agluägäd....dä isch immer no bi über 4cm…also alles tip top! Chönt gmäss FA au dä beckäbodä si wo ich jetzt vermehrt gspürä…das gits öfters, vor allem ab dä 2. SS. suscht gahts mir tip top…bin über d'abkühälig au sehr glücklich obwohl ich d'hitz eigentlich sehr guät verträgä...bin mit dä chlinä eifach dauernd i dä badi gsi

[Smack]

@ Rafa
Morn isch Termin, ETT! Bi scho ganz ufgregt!!!!
So schön das alles guet isch. Super! Und jaja, vo mier us darfs jetzt chli so blibe mitem Wetter. Aber morn isch jo scho wieder heiss

[Rafa]

@smack
i däm fall toi toi toi...druck dir fescht dä duumä!

[Smack]

Danke viel mol Rafa

[Sarenz]

@rafa
Neiiii... Aso säge mers eso: de FA frogt mi: und was gits? Ich: glaub e Bueb.. Er: hmmm..ich gseh do aber nüt zwüsche de Bei! Er het jetzt aber no kei ussag gmacht, het nur gmeint ev. versteckts es jo.. Und susch eher Meitli. Aber er luegt nöchst mol no.. Aso nomol 5 Wuche warte!
Es isch aber fit und munter! Het eus grad zuegwunke.

@smack
Vill spass morn!! Isch sicher alles guet! Muesch de brichte..

@me
Wievill händ ihr so ame zuegnoh? Ich glaub ich bi völlig im rahme met ned ganz 2 kg ide 17. Wuche?