Frühlings-Kinderwünsche - wir haben's geschafft

[black_key]

hallo ier liebe

ich hoffe ier hend es schöns wuchenänd gha? s wätter isch ja doch no rächt schön gsi zum glück

@hunny: ich hoffe hesch d usstellig guet überstande?

[gerbera]

Hallo dir liebe

heit dr ds weekend ou so gnosse? schön 2 freii täg ds ha… mi gg und ig hei beidi mau usgschlafe, naja, är het gschlafe, und ig ha gläse, wüui am morge nid so lang cha schlafe… aber mir hei beidi gfunde, mir müesse das ize no usnütze, solang mr no ke läbige Wecker daheim hei

Mini Fieberblase isch ou am bessere… es zitli hani usgseh wi ne exotische vogel, so ufgschwolle isch si gsi findes obermüehsam, dassi mi gg nid darf küsse… mir hei beidi gmerkt, wi hüüfig dass mir normalerwis enang eifach so es müntschi gäbe, das isch mr vorhär gar nid so bewusst gsi…

wäg de gschänk, kuhl wär eigentlech, wenn d lüt eifach würd frage, und me när äbe chönnt säge, was me no brucht. nuggis choufi ämu sicher kener, und ou so chlichram wahrschinlech no nid viel… Oder wenn me e lischte chönnt mache wi bi de hochzitsgschänk… het ja ke sinn es Tällerset ds becho i 4facher usfüehrig, wenn me eich e kenwood-maschine möcht...

[Gini]

Hoi zäme

Gerbera: I stimme dir voll ond ganz zue, es wär wörkli no schön wenn d Lüt würde froge. Mer hend teilwies au eifach Gutscheine becho, das hani au no guet gfunde. S Doofe isch gsi, mir hend zt Kleider übercho innere Größi, wo zo dere Johreszyt eifach ned würkli passt Hend. Zb gfüettereti Hose wosi aber d Größi grad im Sommer gha hätti...Bi de T-Shirt hani de mängisch eifach es Body drunter aGleit, de hets au passt..

me: I merke dasi uf de Zielgerade bi. Sitt geschter Obe het sich extrem vill do. Mir fehlt d Energie ond i merke, dasi mi am liebste wett zruggzieh ine Höhli. Leider isches ned möglich, die Chli brucht mi au. Das findi jetzt grad Chili e schwierige Moment. I mage ned, ha immer wider gaaaaanz liechti Wehe hani S Gfühl, natürlich noni Geburtsfördernd, aber i merke es goht öppis. Glaube s Chile kämpft sich immer me is Becki abe. Mängisch Hain richtig Party im Buch. Bi gespannt was s CTG morn zeigt..

Liebi Grüess

Gini

[black_key]

@hunny: das glaubi das das astränged gsi isch. das zieh isch sicher de wachsendi buch wo du merksch

euses wuchenänd isch super gsi. ich finds schön wenn mers allne cha verzelle und d lüüt sich mit eim freued.
hüt hani au s gfühl min buch fühlt sich anderscht a als suscht. irgendwie schwer aber anderscht als wenn mer z vill gässe hed oder so. han mer jetzt au umstandsjenas kauft und die sind suuuper bequem

[gerbera]

@ hunny: mi buch het zimlech gnau vor 2 wuche afa zieh, cha mr scho vorstelle, dass das d bänder si, ds baby bewegt sech ja ize langsam ufe richtig buchnabel... Freut mi hesch d mäss einigermasse guet überstande!

@black_key: ja das findi ou super, dass mes ize cha verzelle. Nur ei bekannte isch total uf dr leitig gstande u het gfagt, ja, ob mr de ize chind wöug, oder öb tatsächlech eis unterwägs isch??? I ha gfunde das cha ja ou nur e ma frage

@gini: wi geits dir? Di letschte paar wuche si gloub eifach scho mega asträngend, was meint ds ctg?


Gesendet von iPhone mit Tapatalk

[Gini]

Hallo zäme,

Muess mi grad als erschts entschuldige, dass es nur en Egopost wird. Leider isch min Papi sit geschter unerwartet im Spital, er het sit jeher es schwachs Herz. Mer sind grad am warte uf News, si stelle ne grad ufe Kopf ond i be grad chli am umefroge wär die chli könnt neh falls mir denn müesste losdüse. Gseht zwar gemäss CTG ned so us, aus chiemtis scho morn, aber me weiss jo nie. Bruche jetzt eifach no e Plan B.

S CTG isch 'normal' gsi, nüd ussergwöhnlichs. Im Baby gohts guet, s Fruchtwasser isch au no gnüegend. Es isch jetzt ca 3100g schwär. Mini Gwichtszuenahm isch bis jetzt +9 kg, wasi ganz ok finde. Weiss jetzt au werom i plötzlich so kei Energie me han, mi Blutdruck wo süscht immer Normal gsi isch mit Tendez zu fasch Chili z höchem Puls isch hüt Töif gsi, wie au de Puls. Ha am Morge jetzt ame zuenehmend Schwindel ond vereinzelt wider erbreche. Findes aber so fasch besser aus e z höche Blutdruck, dänke so muess i mer kei Sorge mache wäge Präeklampsie.

Liebi Grüess

Gini

[black_key]

@gerbera: das cha würkli nur vomene maa cho es par lüüt hend eifach gar kei ahnig...

aah ich glaubs gar ned... mier isch afangs jahr es stuck vomene zah abbroche und ich ha das müesse la mache, es hed zwei termine brucht und isch au ned grad günschtig gsi... jetz isch wider en chline egge weg und ich glaub gnau am gliche ort! das chas ächt ned sii

[black_key]

@hunny: nei schmerze hani zum glück gar kei. cha hüt grad verbi.

oh nei so schad... dörfi frage wieso das ned gaht?

[black_key]

@hunny: danke dir. das hoffi au...
ohje ja die katholische sind mängisch würkli chli schwierig.... aber wenn de seelsorger vo de andere gmeind bereit isch das z mache, gitts kei möglichkeit? das hani au ned gwüsst das d taufi bi de wohngmeind muess si.

[gerbera]

@gibi: hoffe dim vater geits gli besser! Chunnt ja grad alles uf ds mal bi dir.

@black_key: villech mache sis ja uf garantie? Isch aber luschtig, hocke ou grad im wartzimmer bim zahnarzt, isch ou es stuck vome flick abgheit...

@hunny: mega komisch, dass si so blöd tüe, süsch findet dr ja villech e gmeind, wos für euch stimmt? I meine isch ja scho gar nümme sälbschtverständlech, dass me überhoupt sis chind lat la toufe u chilchlech hüratet, de verstahni erscht rächt nid, warum si so blöd tüe?

@wolke: das geit ja scho nümme so lang, hoffe es sig de denn alles guet! Aber bi sehr gueter dinge wenni a di dänke! Du hesch eifach ize gnueg seich erläbt!

@me: bechume langsam es büchli, isch ja mega kuhl


Gesendet von iPhone mit Tapatalk

[Awe]

Hoi zäme

@Gini: wie gohts der? Ond dim papi? Esch er weder besser zwäg?

@Gerbera ond black_key: wönsch eu dass de zahni bald verbii esch ond ehr nochher weder rueh händ. Schön wenn dbüüchli chömed, wör mi freue wenn ehr de mol e foti inestelled

@Hunny: oje, dkatholike send ächt mängisch müehsam, bin au katholisch ond ha das bi eusem hochzit au müesse merke wie stur die lür send. Denn esches jo ächt keis wunder wievell lüt de ustritt us de chile gänd...hoffe trotzdem das ehrs glich no so chönd mache wieners eu vorstelled, do wöri nochli drum kämpfe.

@me: hött esch dhebamme es letschtsmol bi eus gsi. Sie esch sehr zfriede wie guet alles lauft. Euse chlii hed bereits es kilo zuegnoh

[black_key]

@gerbera: oou nei ich hoffe hesch de zahni termin guet überstande?

@awe: hey so schön das euche chli zuegleid hed, er möched das super

@hunny: din buch isch uf all fäll gwachse, mit chleider gseht mers halt eifach ned so guet. aber muesch luege, plötzli vo eim tag uf de ander ischer riesig
ja verstah das er ned wänd stürme, bringt jo au nüt... aber ier werded e super schöni hochzit und denn spöter au taufi ha! de hender zwei mal e grund zum fiire, isch doch au schön
mega herzig die geburtsazeig!! ganz schön... vorallem neutral, gaht super für bueb und meitli

@me: zahni termin isch churz und schmerzlos gsi, und es choschtet au nüt
min buuch wird au langsam runder und wenni nüt all zu wiits aha gseht mers

[black_key]

...@hunny: übrigens, machsch du täglich fitness oder wie chund mer zu somene muskulöse buch?? komplimänt!!

[wolke7]

@gini: tuet mer leid wäg dim papi- hoffe es goht em bereits besser?
Schön esch met em chline alles guet! Hesch der wäg em bluetdrock scho mol stötzströmpf öberleid?

@black_key: hey super das du nüt muesch zahle, wär jo scho fascht fräch gsi.

@gerbera: hoffe din zah tuet ned zfescht weh- esch jo glaub no müehsam wenn öpis muess gfeckt werde i de ss hani gmeint?!

@hunny: also ich gseh das büchli au ond din entworf esch mega schön- gfallt mer! Schad klappt das ned so wie er euch da vorgstellt händ...mer händ au alles katholisch gha ond den no s'glöck das min cousin (oh man wie schriebt mer da scho weder?!) pfarrer esch ond sälbst er het nor taufi allei gmacht. S'hochzit het den es paasr monet spöter en kolleg vo ehm gmacht. Die zueständige pfarrer vo de gmeinde wos ahgange esch händ do aber zum glöck öberhaupt ned müehsam to!

@awe: ui scho es kilo du hesch ko bombe muettermelch!!! Känns vo minere- esch au es finöggeli gsi wo sie ufd wält cho esch!

@me: bis gester beni rächt ruhig ond optimistisch gsi, sb het fascht ganz ghört gha. Höt mettag hets den weder ahgfange ond ich han weder voll die hormongstürti panikattake öbercho ond hans ahgebot vo de kiwu ahgnoh dasi emmer chönni verbi cho. S'herzli vo mim chline pöpperlet fliessig ond es esch mega gwachse- alles wies muess si!!! S'hämatom gseht mer eigendlech au nöm, aber die cheibe zwoiti leeri frochthöhli esch emmerno ome...evtl chömi d'bluetig vo dem. Wieter abwarte ond positiv bliebe...aber ich muess säge die kiwu döktis send de absoluti hammer- die send so herzlich ond gänd sech so vell müeh ond freued sech glaub wörklich met de lüt wenn sie positivi news chönd geh!

Ich wönsche euch no en schöne obig!

[black_key]

@wolke: ich wär a dinere stell au beunruhigt gsi wäg de sb. guet das jederziit id kiwu chasch und du det so super betreut wirsch. das freut mich sehr das alles guet isch! was säit denn de arzt wäg de zweite leere fruchthöhli?

[wolke7]

@black_key: sie meinet die frochthöhlk beiflossi d'ss ned, sie esch vell chlinder als mis chline ond sini frochthöhli. Es chan sie das sichs ergendwenn resorbiert ond wegg esch oder das es abblüetet. Han scho ghört das es au bis zum schloss vorhande chan sie ond den halt bi de gebort met use chont. Ich hoffe das es ergendwenn eifach weg esch!

[black_key]

@wolke: ok, ich hoffe das du bald kei beschwerde meh hesch und d ss in rueh chasch gnüsse.

@hunny: ok ned schlächt... aso würkli top

@all: ich liese immer wieder vo hebamme und das mer sich früehzitig drum muess kümmere... wie isch das genau, hend ier euch mit dem scho usenand gsetzt? lauft das über de spital womer denn wählt oder isch das unabhängig?

[gerbera]

@black_key: es git viel fa-praxe, wo e hebamme derbi hei, und scho abiete, dass me paar untersuechige bir hebamme cha mache. Oder du suechsch dr säuber e freischaffendi hebamme ir nöchi. Unter www.hebamme.ch fingsch die eich alli. Gebäre tuet me normalerwis när bi dene hebamme, wo im spital agstellt si. Di freischaffende mache eifach d voruntersuechige u d wochenbettbetreuuig. Oder es git ou gabz wenigi beleghrbamme z.b i geburtshüser, de chasch dr eini sueche, wo di dür alles düre begleitet, wenn dr das wichtig isch.


Gesendet von iPhone mit Tapatalk

[black_key]

danke villmal gerbera.
weiss ned öb mini FA das abütet, sie hed no nie öpis devo gsäit...

[gerbera]

@black_key: auso wenn si das abiete, de frage si normalerwis, ob me dr Termin ir 16.-18. Wuche bir Hebamme wot mache. Und dä hesch du ja wahrschinelch scho gli, mine isch ämu scho wieder nächscht Wuche.