Frühlings-Kinderwünsche - wir haben's geschafft

[black_key]

@gerbera: ou fieberblase sind sicher mega nervig. ich känns zum glück ned ha no nie gha. aber vill meh mache als die patches druf due chasch glaub ned...
mier isch defür die wuche jede abig zimli schlächt... ich hoffe das hört jetzt denn au wider uf

cool sones babybay isch praktisch, das wotti denn au. mier gönd aber zerscht id ferie und legged denn mitem shoppe los

[black_key]

@hunny: ich hoffs au... wie gahts dir??
mier gönd am 10. mai. mier gönd id USA, flüged uf las vegas und gönd vo det us mitmene motorhome i einige nationalparks. am schluss simer nomal in las vegas und fiiret det de 1. hochzitstag

[black_key]

@hunny: ja ich freu mich sehr es wird sicher traumhaft. d FA hed au s ok für alles geh, mier hend ja die reis scho buecht bevor ich SS gsi bin. ich hoffe au das d übelkeit bis denn besser isch aber bis jetzt hanis nur immer nachmene lange tag gha wenni ha müesse schaffe. am wuchenänd isch ami vill besser. mer gönd 16 täg,
super das freut mich, so chan mers richtig gnüsse

[gerbera]

@black_key: das isch ja super, gniessets de, isch e super zit für das ds mache! u mitem Wohnmobil isch sicher ou e geniali sach, Trouriste hets um die Jahreszit ja ou no nid derhuufe… Und ds Amerika ischs ja ou nid so, dass ke Hilf bechiemsch, wenn du öppis medizinisches brüchtisch…
Mir geits im Fau ou schlechter, wenni e stränge Tag gha ha… ghört villecht ou chli derzue, dass haut d Batterie schnäller läär si…

@hunny: schön geits dir ize so guet, Bluetige hesch ja scho lang nümme gha, gäu? Ha ize zuesätzlech no zu Zovirax griffe, isch eländ, mittlerwile si di ganze Lippe wund… isch haut scho so, dass ds imunsystem chli gschwächt isch ir Schwangerschaft, de chas gloub so öppis no ender gä…

@me: äbe, müehsam mit de Lippe, süsch isch aber alles guet. Ha chli es schlächts gwüsse wägem Zovirax, aber dräie ächt fascht düre… Da Merkt me gloub, dassi süsch geng gsung bi, kenne so wehwehli gar nid so...

[black_key]

@gerbera: danke, das werded mer ich dänke au dases vo de medizinsche versorgig keis problem wär.
genau es isch sicher au es zeiche vom körper das mer halt so täg nüm so guet mag wegstecke wie vorher.

wägem zovirax muesch der glaub kei sorge mache, das chan mer ohni bedenke icreme

[black_key]

.. wie gahts ächt de mimi? ich hoffe alles ok?

[black_key]

@hunny: ok denn isch hoffentli alles guet bi ihre...
das isch u schwierig mit de chleider, ich han au scho mal chli gluegt. muess au es chleid ha für es hochzit für im september. die wo einigermasse schön sind sind unglaublich tüür. ha der leider au kei tipp, aber falls ich öpis gseh würdis dier säge suechsch es langs oder es churzes chleid?

[gerbera]

@hunny: ja ha mi ou scho gfragt wis ar mimi geit, isch si de mau online gsi?
kennsch bigbelly? oder 9months? da hets zum Teil schöni sache… aber haut nid mega viel uswahl…
u süsch chasch ou no uf zalando luege? oder huat mau uf ricardo, villecht isch ja genau ds richtige chleid dert unterwägs?

[wolke7]

@gerbera: ben i minere jugend vo fieberblotere bloget gsi- all monet mendestens eini...leider chasch ned vell meh mache alsd scho tuesch! Die zum ufchläbe send eifach no guet sobalds mol offe send, soscht bränneds amel so wenn öpsi druf chont ond so eschs ächli besser gschötzt!

@black_key: oh das tönt den schön- bis denn esch au das met em schlächt sie besser muesch luege!

@hunny: ich het no es schöns umstandschleid wo ich als brutjongfere i de 24 ssw ahgha han- wennd möchst chasch mer per pn dini natel nr dore geh, den chan ich der es foti zueschecke! Esch im babydoll stil ond drom chämts ned so ufd grössi druf ah...s'einzige esch halt d'oberwieti wo zemli geh esch bim chleid.

Shope: babybay hani au gha bi de tochter ond öpis vom beste wo mer sich chan zuetue! No sehr zempfähle för di ersti ziet fend ich s'dondolo ond es tragtuech ond mer händ en weckelteschuflag för ufd badwanne- damals us platzgrönd aber ich wörds jedem empfehle. Wenn di chline am afang emmer alles voll mached chasch grad alles id badwanne rüehre, s'babyzemmer chamer grad i de nacht wenns chline schloft nochher au schlächt löfte ond hesch emmer grad flüssend wasser näbedra- ond chostet no dütlech weniger als en weckelkomode ond den het em im chenderzemmer no meh platz för anders!

[black_key]

@wolke: danke vill mal für dini tipps! das isch mega hilfrich, da mier no gar kei erfahrig hend das mit de wickeltisch uflag für d badwanne findi en super idee. nur isch bi eus so das mier kei separati duschi hend, aso zum dusche id badwanne müend. isch denn das ächt umständlich zum jedesmol wegneh?
wie gohts dier suscht?

[gerbera]

@wolke: i ha mr ds genau gliche überleit wie d Blackkey, wäg dr Badewanne, das isch glichzitig ou üsi duschi… i ha aber de ds chinderzimmer grad näbem Badezimmer, auso ei tür use, di andere näbedranne wieder ine, dänke i loufe de amigs eifach gschwing übere für ds füdli abdsschwänke...

[wolke7]

Wickeluflag: mer händ halt no en seperati duschi näbed dra, das eesch secher praktischer als wenn ers jedes mol müend wegneh- aber es esch mega eifach ond au liecht. Also das chasch nor so drab löpfe, muesch nüt schrube oder so ond wiegt öpe 2kg wörd ich schätze. Send aber trotzdem mega stabil ond höheverstellbar! Nomol en tipp: wenn euch d'lüt froged was mer chan schänke ond euch nüt in senn chont- wendle! Ich ban sehr vell sache vo minere schwöster scho gha ond drom möm vell brucht ond han mega vell wendle gschänkt becho- händ die ersti packig kauft wo sie 1/2 jährig gsi esch ond das spart en hufe gäld! Was ich au no sehr cool gfonde han esch die babyschale för ufs triptrap- so het di chli amel wenn ich am choche gsi ben bereits ab gebort chönne näbed dra sie ond esch vell ruhiger gsi wenn sie mich gseh het.

@me: mer gohts bez besser. Han am ziestig no de ganz tag brune usfloss gha ond den erst gester zobig weder gaaaanz es bezeli- hoffe das es bald ganz ufhört. Mini angst esch nach em ontersuech am mentig au bez besser gsi aber fangt weder langsam ah...ich weiss zwar das da herzli schlot, aber was esch wenns bim nöchste ontersuech plötzlich nömme tuet?! Es helft aj ned grad das ich i dere ss dütlech weniger symptom han als i de 1. (glaub ich amel) respektive sends mängisch eifach en tag oder zwoi weg ond chömed den weder- ich nerv mich so ab mer sälber das ichs ned eifach chan gnüsse

[black_key]

ah ok das wär demfall ned sones problem. evt. düemer au eifach en wickeltisch is badzimmer, für en schmale hetted mer platz näb de badwanne.
ich dänke au das mer eus vill so praktischi sache werded wünsche wenn eus d lüüt froged. so chleidli usw. chunnt mer meischtens sowiso gnueg über und für am afang bruchts ja no kei spielsache und so züg.

ha grad gseh das mer d babybay au cha miete, wär evt. au no guet. mer bruchts ja ned sooo lang dänki...

[wolke7]

Ich han mers babybay grad noch em spitalufenthalt kauft (han im spital scho gmerkt das da müt werd met allei schlofe ) för glaub 250.- ( han grad gschänkguetschin vom babyrose ufbrucht för da)ond hans den doch 6 mönet brucht- den hani no 3 mönet s'chenderbett näbed mim bett gha- sie esch mer eifach z'akziv worde förs babybay, vo de grössi wärs no lang gange. Weiss gar nöd was es a mieti wörd choste- hesch den ned en kollegin wos der wörd uslehne?

[black_key]

@wolke: cha dich voll verstah das du dir sorge machsch. ich glaub es isch eifach normal und wird nie würkli besser. sitt em letschte US isch bi mir zwar vill besser worde aber trotzdem macht mer sich alli mögliche gedanke. mer muess au keis schlächts gwüsse ha wenn mers noni so cha gnüsse und halt vorallem no angscht hed. aber ich bi sicher es chunnt alles guet bi dir! wenn hesch de nächschti termin?

ich ha vori gseh das mers neume für 30.- pro monet chönnt miete... nei ich känn ebe gar niemer wo so eis hett woni chönnt uslehne oder überneh. ich luege au mal no uf ricardo usw.

[wolke7]

@black_key: ich chan am 5.5 weder goh, denn bi mim normale fa. han aber vom kiwu dökti s'agebot becho das ich mich beder ziet dörf mälde wenn ichs nöm ushlate, den chan ich gschnäll verbi goh.

Also 30.- esch jo no gönstig, wennd aber rächnisch das din worm evtl au 6 mönet drenn liet besch bereits bi 180.- ond evtl wänd er jo no es zwoits wo au nomol 6 mönet drenne liet- denn hetsch bereits es neus kauft (guet mösstischs ned i de zöscheziet ergendwo verstaue bis es wieters chont, nemmt nämli alles mega vell platz weg alli die sache) oder jo wie du seisch alli die ricardos, olx, tutti doreforschte- werde mies secher au mol is ricardo inestelle (nomol en vorteil vo neu- chonsch velecht nochli öpis deför öber ) aber gäll ich wott der do nüt ufschwätze- säge do eifach was ich för erfahrige gmacht han ond werom ond wieso ich was gmacht han- das muess jo ned zwangsläufig för euch so au stemme

[gerbera]

@wolke: Gloube dass du di stressisch, aber muesches so aluege, wenn ds härzli gschlage het, de isch ds fg-risiko scho massiv gsunke! dänke uf jede fall fescht a di, und gloube ganz fescht, dasses guet chunnt!

ja ds tripptrapp mit babyschale isch bi mr ou uf dr lischte, aber das het ja no chli zit, findi… gloube ou, dass das mega gäbig isch… dondolo würdi gloeub de zersch mau bi öpperem usprobiere, s git ja chind, wo das gar nid gärn hei…
Dä mit de windle isch no e gueti idee, ou wenn mir gloub sehr viel sache wärde bruche, i ha mi nur nid derfür, mega tüüri sache ds wünsche… drum sin windle no e guete kompromiss

@black_key: i ha für babybay, praktisch neuwärtigi matratze, neue Molton, fixlintuech und Näschtli 90.- zahlt im Ricardo… aber ha ou mega schwein gha gloub… me muess eifach immer chli ga luege…

@me: hei dir gloubets nid, i ha geschter ar Sitzig gseit i sigi schwanger, und hüt längt mir doch tatsächlech scho e arbeitskollegin eifach ungfragt a buch u strichelet ne???? i ha im fau dänkt i spinne!!! erschtens ischer no gar nid gross oder so, me gseht ja ersch so e chlini wölbig, und zum andere, wi cha me nume? wüsst dr wassi meine? i hare grad sehr klar gseit me längi are schwangere nid eifach ungfragt a buch, und i heigis eh nid gärn, wenn me mi alängi… Tja, de chani scho grad üebe für wenns de no schlimmer wird...

[black_key]

@wolke: ah super, de chasch jederzit verbi wenns nüm ushaltisch. aber ich dänke jedi wuche wo verbi gaht wirds besser und nach de erschte 12 wuche sowiso.

da hesch du au wider rächt. ich dänke au ich wirde mal bi de occasione ume luege.
isch mer au gar ned so inecho das du mier öpis wottsch ufschwätze, im gägeteil bin froh um söttig inputs ebe ich ha nor gar kei ahnig was mer brucht und was ned und würd eh meischtens mis mami frage aber zu dere ziit heds vill vo dene sache noni geh drum weiss sie ebe au ned zu allem öpis.

@gerbera: wow das isch würkli es super agebot! ich due demfall jetzt au immer regelmässig umeluege was es hed.

hää was? sorry das gaht gar ned.... aso ich find die einzig person wo das dörf isch de partner und je nach dem no teil lüüt vo de familie. finde guet hesch so reagiert, de wird sies sicher nüme mache. bis jetzt isch mer das im gschäft noni passiert, merke nur das mier alli jetzt immer uf de buch lueged bim rede

[gerbera]

@black_key: ja es git villecht e handvoll lüüt, woni mr das würd la gfalle… aber es isch ou schön, dass alli so freud hei für mi, und ou drüber wei rede u so, isch de gar nümme so ne grossi sach gsi, das ds säge, wüus ja d Arbeitskollegin woni mitere uf gschäftsreis bi gsi und dr chef eh scho gwüsst hei… Aber das hani glich grad müesse abstelle, ha mr scho gschwind überleit uf d zähn ds bisse, aber muess ja no 5 Mönet schaffe, und das ertrage ig würklech nid duurend...

[Awe]

@gerbera: guet hesch das metem buch alänge grad gseit, do werded wahrschindli no meh settig situatione cho. Ich has au gar ned gern gha wenn mer eifach aglanget hed, vorallem ned i dem stadion wo du jetzt grad besch wenn de buch noni rächt do esch.

@gschänk: stimme de wolke zue, windle send es super gschänk. Ich merk das jetzt mega wie vell dases brucht all tag, das esch unglaublich. Han vo öpperem en riese windeltorte öbercho ond bi ächt froh vo anderne sache werdeder eh gnueg öbercho. Han glaubs scho öber 10 nuggis öbercho ond min bueb hed bis jetzt no gar keine brucht. Musigdose hani au scho die 4

Wönsch eu es guets weekend