Frühlings-Kinderwünsche - wir haben's geschafft

[Kizank]

Danke für eui Glückwünsch!

Ok, da mini 'churz' Zämefassig.

I de Nacht vom 5. uf de 6. Januar hani mol gmerkt, dasi starke Uusfluss gha ha. Farb und Konsistenz wie de normal ZS, eifach meh wie normal - hamer nüt gross dänkt, wili am 5. praktisch gar kei Uusfluss gha han (aka "het sich halt irgendwie gstaut und im Ligge denn glöst"). während em 6. hani aber de ganz Tag vill Uusfluss gha und scho dänkt, ja s goht worschinli nümme lang. Am 11i hani dänn en chliine Gelee-Chlumpe am WC-Papier gha und ere Fründin wo Hebi isch aglütet. Si het denn gmeint, dass das worschinli de Schlimpfropf gsi sig. Am Namittag isch no mis Mami cho und mir händ chli käfelet und gschwätzt (Im Nachhinein simmer beidi froh, hani ihre gegenüber ned erwähnt, dass de Schlimpfropf abgange isch).
Am Abig am 5i bini scho fäng chli nervös gsi, will de Uusfluss unveränderet stark gsi isch, und han is Spital aaglütet. D Hebi dete het gmeint, das chöni guet sii, wenn de Pfropf wägg isch, dass no Schliim nahchunnt, ich dörfi aber au verbiicho, damit si teschtet, ebs Fruchtwasser debii het. Han de gseit, ich lueg mol mit mim Maa. Wo GG churz vor em 6i heicho isch bini mega froh gsii. I dem Moment woner mi id Arme gno het hani gmerkt, wie wider en ganze Gutsch id Binde gaht. Uf em WC d Binde aagluegt, liecht roseroti Farb. Gad nomol is Spital aaglütet. D Hebi het gseit, ja das sig worschinli d Fruchtblase gsii.
Mer händ de no Znacht gässe und en Bekannte us em Dorf aaglütet, eb er eus is Spital fahre chönnt.
Churz vor em 8i am Abig simmer denn dete gsii. Wehe hend no kei spürbari iigsetzt bis dänn. D Hebi vom Telefon het eus in Empfang gno und mit eme Teststreife chönne bestätige, dass Fruchtwasser debii isch. Vermuetli isch si obe draa grisse, drum hets nur relativ chlini Gütschli gäh. Drufabe de üblechi SS-Check mit Ultraschall und CTG (und laaang warte uf Ärzt) simmer am 22 ines Zimmer bracht worde. Det hani langsam aagfange, Wehe z gspüre, was d Hebi mit eme witere CTG bestätigt het. Em Schätzli isches prima gange. D Wehe sind dänn langsam stärker worde.
7.1. so um Mitternacht sind d Wehe all 4-5min so stark gsi, dasi nümm ha chönne Schlaafe, han denn es Zäpfli übercho, wo aber ned würkli gwürkt het. Es isch ushaltbar gsii, drum bini eifach wachgläge und ha uf de Morge gwartet. So um di 6i hani gmerkt, wie d Wehe wider schwächer werded. Bis am 10ni sinds zwar no ufzeichnet worde, aber nümme spürbar gsii. Bi zwar total uf em Hund gsii, aber trotzdem fliissig alles mögliche probiert, d Wehe wider in Gang z bringe - vill Laufe, Stäge, Wehetee, Fuessbad, Buuchmassage, ... Und immer de Blick uf d Uhr, 17 hetti mer iigleitet. Churz vor 17 dänn het s CTG biz öppis ufzeichnet, dass d Hebi nach Absprach mit eme Gyni gmeint het, s sig z heikel zum iileite, wäge Gfahr vo Wehesturm. Am 22 het me nomol es CTG gmacht, d Wehe sind wider zrugg gange. Denn nomol Absproch mit Gyni und denn het d Hebi d Tablette iigleit. E Stund spöter hend d Wehe abrupt voll iigsetzt und sind au blibe.
8.1. irgendwenn i de Nacht wider es Schmerzzäpfli übercho, wo nüt gnützt het (extra es anders wie i de erschte Nacht). Die Nacht isch zimli de Horror gsii. GG het näbedra uf eme Faltbett döset und isch mi ab und zue cho hebe/tröschte/massiere. Ab em 5i hani zwüsche Wehe und nöd-Wehe nüme chönne unterscheide (ussert, wenn gad s CTG gloffe isch, det het mes gseh) - Buuch und Rugge sind eifach ei grossi Schmerzzone gsii. Ha am ganze Körper unkontrollierbar zitteret. 70 Stund ohni Schlaf fordered irgendwänn eifach ihren Tribut... Wo zwüsche 06 und 07 d Schicht gwächslet het, het di neu Hebi d Händ überem Chopf zämegschlage und gseit, also da gits nur no PDA, sust schaffi d Geburt nümme (Mumu gad mol Fingerdurchlässig gsii).
Am 07 hends mi in Gebärsaal bracht - GG und Hebi händ mi müesse in en Rollstuel lupfe zum mi in Gebärsaal z transportiere, ha ned mol das me us eigener Chraft gschafft. Nachher ischs relativ fix gange, d Gfahre vo PDA kenni, wili mol e Lumbalpunktion gha ha. Si händ mer denn en Wehehemmer gsprützt, und wäg de Skoliose händs gad zwei mal dörfe stäche, bis d PDA richtig gsesse isch. Ab det ischs mr chli besser gange. Isch en wunderschöne Tag gsi und ich ha mim Bueb immer wider gseit, "jetzt muesch pressiere, damit du das wunderschöne Wätter hüt no mitbechunnsch"... Han ändlich mol es bizzeli chönne döse. Trotzdem bi villne Wehe wider verwachet, oder wenn öpper in/us em Ruum isch, umlagerig gmacht händ etc. Bim Taschte vor em Mittag isch de Mumu immerhin 5 cm offe gsii. Wili mr chli Sorge gmacht han, hani mir vo de Hebi no bestätige lah, dassi trotz PDA d Geburt mitbechume - ha angscht gha, ich würdi das denn ned richtig merke...
Am 13 isch de Mumu nüm wiiter uufgange, d Hebi het agfange, Wehemittel dezuegäh. Churz drufabe hani e uu mega Wehe gha, wo mega lang aaduret het. Hani de Hebi gseit, und si het so komisch ufs CTG gluegt. Dänn isch ufzmol e riese Ufregig gsii, plötzlich isch de ganz Gebärsaal voll Lüüt gsii, und si händ mis Bett hine abelah (Chopf de tüfschti Punkt) öpper het uf mim Buch umedrückt, no öpper e Sprütze (Wehehemmer) gäh, dänn bini uf di ander Siite gwuchtet worde, und plötzlich isch wider Rue gsii. D Herztönli vom Elia sind plötzlich abgsackt und nüme ufecho. Natürli hani vo det aa s CTG nümm us de Ohre glah (Display ned gseh). Chum het s Herzli langsamer plopperet, bini i Panik grate. Ha denn no es Suurstoffschlüchli id Nase becho, will d Sättigung nümm guet gsii isch, wili chum me ha möge Schnuufe. X mal helli Uufregig, will d Herztönli abgsackt sind. Dänn händs de Wehetropf abgno (Mumu länger bi 7 cm stahblibe, s Schätzeli isch au nüm richtig abegrutscht).
Am 16 isch d Abigschicht-Hebi cho - die gliich, wieni bim Untersuech am 30.12. gha han. Si het ei mal vaginal untersuecht, dänn de Wehetropf voll uegstellt, gluegt was passiert, Wehehemmer gsprützt und gseit, dass me sofort KS mached, sus schaffts mis Schätzeli nöd.
16:25 het d Hebi gseit, jetzt bruchts en KS
16:44 isch mis Schätzeli da gsii
Die gliichzitig längschte und au chürzischte 19 Minute voll Angscht, Hoffnig, Unsicherheit. Rundume es Ghetz, en OP voll fremde Lüüt. GG het sich umzoge und het min Chopf ghebet. Plötzlich isch d Hebi, wo mi am 6. ufgno het näbed mim Chopf gstande, und het gseit, sie blibi da, bis s Chindli da isch (Si isch au die gsii wo am 7. d Iileitig gmacht het). Si het mer au immer gad echli gseit, was si mached. Wo si ihn useglupft händ, hani ihn ganz churz dörfe gseh und bin mega verschrocke, wiener am ganze Körper blau gsii isch. D Hebi het mi aber gad beruhigt, und isch churz mit em Arzt mit, und isch zrugg cho säge, dass ers ganz guet machi, brüchi nur no chli Suurstoff.
Nachdem si mi denn ändlich zämegflickt gha händ, hani de Elia mol dörfe chli streichle, aber er het no müesse am Suurstoff sii under de Wärmelampe. Und ich han so mega chalti Finger gha und ha zitteret wie blöd - ha fasch Angscht gha, das zarte Chindli so aazlange.
17:30 umenand simmer in Gebärsaal zrugg, nachdem si mi no uf es anders Bett glupft händ. De Chinderarzt isch gad mitcho und dobe het er denn gseit, dass er jetzt gnueg schnuufet und dörf zu mir cho. Irgendwie ischs komisch gsii, wie wenn er gar ned uf d Wält cho wär... Ha mi chli schwer tue. Ussertdem isch er soo mega schwach gsii, das het mr so Angscht gmacht. Aber er isch so en herzige gsii, und het früe scho d Auge uufgmacht und het umegstuunet, woner do glandet isch.

Ha no im Gebärsaal es zNacht übercho und d Hebi het mi chli gwäsche. Ha mi gad es biz besser gfühlt. GG het i dere Ziit euse Bueb ghebet. Nachher händs mi id Wochebettstation gfahre. D Hebi dete het nur gseit, "Ich stell mi jetzt gar ned gross vor, mer händ jetzt gad Schichtwächsel". Bin ines 3er Zimmer cho mit eme liebe Zwilingsmami und einere, wo kä Dütsch het chönne. Die händ di ganz Zit es rise Züüg gha, will die Frau sich so schwer tue het a allem. Di ganz Nacht het die Frau s Liecht aagmacht, de Heizstrahler aagloh wo pfiifft, wemme z wiit wäg gaht und ihres Baby het so vill briegget. Dezue het de Elia immer wider erbreche müesse, isch regelmässig gholt und überwacht worde, mir händs am Tropf umegnäschtlet, Morphium gsprützt und uf em Buch umedrückt. Schlimm isch au gsii, dasi em Elia nüt ha chönne hälfe, wenn öppis gsii isch - wäg de Schmerze hani ned emol chönne ihn a mich anenäh, zum beruhige, oder wenn er gchötzlet het. Ha immer müesse de Hebi drucke. Ich ha wider käs Aug zuebracht die Nacht.
Immerhin isch die Frau, wo kä Dütsch het chönne am nöchschte Tag hei.
Am 9. so am 10ni hani s erschte mal chönne uufstah. Worschinli wili gad bi Schichtwächsel uf d Station cho bi, het mir niemert zeigt, wo was isch etc. Zwei mal händs mi blöd aagschnautzt, wili öppis gfrogt han, woni doch hett sötte wüsse. S Zwilingsmami isch denn so nätt gsii, und het mer de am Namittag, woni halbwägs ha chönne laufe alles chli zeiget. Allgemein hani d Ziit im Spital sehr schwierig empfunde. Jedi Hebi het ihri eiget Art, öppis z mache, und jedes Mol, womer öppis so gmacht het wie di eint, hets e anderi mitbecho und grüfflet, das chöni me aso scho besser mache (aso uf ihri Art).

Ich hoffe, dass es allfälligs Gschwüschterts normal dörf uf d Wält choo, und mer dänn schnällschtmöglichscht us em Spital wäggchömed. Vilicht in es Geburtshuus, für die erschte paar Täg. Oder gad hei.

Bin jetzt froh, dasi e Kollegin han, wo Hebi isch, und mi so guet unterstützt. Im Moment kämpfe mer massiv mit em Stille. Er het eigentlich vill z langi Schlafpause (bis 7 Stund) drum holi ihn all 4h, probiere aazsetze, dänn Wickle, Schöppele, beruhige, abpumpe, Züg uswäsche. Und i de 1.5 bis 2h dezwüsche probieri z schlafe... Euse Schatz brucht no vill Ziit für alles. Me merkt, dass d Geburt au ihn stark beasprucht het.

[Tiare29]

Ojee kizank.. schad hend ihr so en schwierige start gha (ha gad träne ide auge) und au spital nid sooooo hitig gsi isch i wünsch eu etzt ganz en guete start dihai und die unterstützig wo ihr bruched..

[black_key]

liebi kizank ich gratuliere ganz herzlich zu euchem sohn und hoffe das iers jetz nachem schwierige start guet händ!

[Raffi89]

Liebi Kizank graduliere eu vo ganzem Herze zu eusem Sohn Elia. Isch en wunderschöen Name . Ich hoffe ihr erholet eu ganz schnell.

[Awe]

Hallo zäme

Wie gohts euch allne?

Kizank händer eu chöne iläbe dihei ond chli erhole?

@Fea: wie gohts der? Meinsch esches bald sowiit?

@me: bin hött morge bim ultraschall gsi. zuckertest esch tip top ond metem baby esch au alles beschtens.

[fea]

Hallo awe, schön au mol wieder vo dir zhöre und dases dir und em chline nach wie vor so guet goht!!

au uns gohts guet! ich gniess es TOTAL jetzt nümi miesse schaffe...ka no einiges erledige oder au eifach mol paar stund ufem Sofa blibe

nach däms e paar dag total ruhig gsi isch in mim buuch, hets jetzt letscht nacht wieder afo krampfe und duet sich immerno öbis..aber unterscheidet sich nid zu all dene vorwehene woni die letschte paar wuche ka ha...irgendwie fürcht ich scho, dass ich die chlini no 2 wuche wird mit mir umetrage..(aber ich kas doch langsam wirklich kuum me erwarte!) morn chunnt d Hebamme nomol cho untersueche, do bini seeeehr gspannt was si denn meint...

[sportyspice]

huhu

@Awe: juhui, so schön, langsam gohts au nümm lang bi Euch.

@Fea: und witerhin alles Ruig? Bisch scho am Himbeerblättertee trinke?ingwer und Zimt? Und am Stägelaufe oder bisch no schön relaxt? gniess es no biz... weiss scho meh denkt: "wie sell i das chönne gniesse..." d neugier und ungeduld isch viel grösser, aber i denk jez im Nachhinein hätt i wirklich chli sette vorschlofe und no mehr gniesse. Bi sehr froh, het mi GG 5 Tag bevor die chlini cho sich no Fotosession welle mache.

@Kizank: wie gohts euch eso? Heid ihr euch scho biz erholt? Gohts euch als Familie guet?

@me and little baby: Mir heis sehr guet, die chlini isch dr absoluti Hammer und mi täglich Sunneschien. Mittlerwile trinkt sie wirklich super an dr Brust. (ha am afang, aber fascht s tuech gworfe... das het am afang abartig weh do und i ha bluetigi Bruschtwarze ghz...so das ich oft mehr bluet abpumpt han als Milch- will i nid ha welle, dass sie das trinkt.)
Znacht lost sie mich mittlerwile au länger schlofe, und so bini am Morge au wieder chli usgruihter. Sie macht mir min Mamijob nid bsunders schwer und schreit praktisch nie. Sie isch so e chlises härzigs Menschli, wo meh eifach voll und ganz muess liebe. bi es sehr stolzes und glücklichs Mami... würd sie nie meh geh und bin so froh isch sie do.
Isch no verrückt, morn hätt sie sette uf d Welt cho...

[Awe]

Hallo zäme

Wie händers?

@fea: wie gohts der? han scho dänkt du besch im spital aber wie ich vorher schnell gseh ha hesch di bi de februarlis gmolde, dass emmer no am "warte" besch. hoffe du döfsch dis chline schätzli bald im arm ha, bin ganz gspannt uf dini news

@sportyspice: schön vo der z'lese ond das ehrs so guet händ metenand han au scho vo paarne ghört dass am afang harzt bim stille met schmerze, etc. ond känne au settig wos weder lo sii händ, aber glaube d'muettermilch esch eifach s'bescht förs chliine ond drum findi din durchhaltewille super ond jetzt klappets jo au. morn hed sie jo scho de 1-monets-geburtstag , so herzig

@me: ich bin min nestboutrieb am usläbe mer send bald ganz guet grüstet förs chliine ond bin froh esch alles bald gmacht. gester esch mer nämli bewusst worde, dass es jetzt no öppe 11 woche goht ond das esch würkli nüme so lang. freu mich riesig

[fea]

@awe: schön isch bi dir immerno alles so guet und happy!
jo das isch eso, i bi am warte und warte...mag mi mittlerwile kuum me bewege, versuech jede dag wenigstens schnäll go iikaufe oder so, eifach chli bewege..aber die meisti zyt sitzi oder liegi ufem Sofa und wart uf wehe (also ich nutz d zyt scho produktiv, ich bi eini wo immer dusig Sache no zerledige het).... i ha ganz viel ganz ruhigi däg...denn bini au fit und denn isch s warte au ok..aber denn hani mängi däg und nächt mit so diffuse vorwehe und das isch sehr eklig..erstens schmärzhaft und energierauend...zweitens gohts au närvlich and Substanz will me immer druf wartet dass sich irgendöbis regelmässigs drus entwicklet oder so... aber naja, s KA jo jetzt gar nümi lang go...am sunntig hani ET und am mäntig dr nägst Kontrolltermin wenn si bis denn nid do isch...denn bini gspannt was är seit resp. wie s Procedere isch..wie ängmaschigi kontrolle ab ET und wie lang si eim zyt gän bis zum iileite etc....

[Gini]

Hoi zäme

De Kizank ond de Sportyspice möchti no ganz herzlich gratuliere zum chline Wunder!! Ig hoffe, ihr hend euch sowit bis jetzt guet chönne erhole. Zyt loh debi, das isch wichtig!

Bi scho gspannt uf d Fea, wenn gohts ächt los? Ui Ui, so schön! Alles Gueti!

Me: Mer send grad erchältet, die Chli ond ich..s zieht sich irgendwie id Längi. So goht d Zyt au ume, immer chli am Huusmitteli mixe/mache ond hoffe, s goht so gli verbi. Am 10.02 hani de Zuckertest ond freue mi, s Baby de wider emol z gseh. Hoffe so fescht, dass alles im grüene Berich isch. Aber findes guet wird gluegt, wirdi doch schon 35i das Jahr..hihi

Bis bald, möchets guet!

Gini

[Mimi83]

Halli hallo mitenand
So ich wog mich jetz mol do mit euch mit z schribe. Offiziell Han ich hüt min NMT mit eme positive Test dörfe Abschlüsse! Es isch immerno so unwirklich. Glaub d emozione chömmed de so richtig wenn ich s mim GG am weekend a dim geburri darf verzelle! hoff das a gli no meh nocherücked, damit mer üssem treffe es stückli nöcher chömmed! so zum Abschluss schick i no e Test won ich vorher gmacht ha! Wünsche euch e gueti Nacht! [img]http://tapatalk.imageshack.com/v2/15/02 ... 2ca1c7.jpg[/img]

[roehrli85]

@kizank: i ha gmeint ka i h a gschribe, aber has äuä vergässe. I ha dir no ganz fest wöue gratuliere, i hoffe d Turbulänze si scho fasch chli vergässe und dir chöits iz richtig gniesse!

@Mimi: weni scho gad ou da bi, hoffe dass du di hie ir Gruppe chasch richtig ikuschle und mir ou baud aui nacherücke!

[Mimi83]

@roehrli: danke der vill mol!

[Awe]

Liebi Mimi83: gratuliere der nomol vo herze ond freu mi sehr besch bi eus debii, damet mer eus chli
chönd ustuusche Jetzt hämmer vo früsch schwanger bis zumene monet alte baby alles i de gruppe

gäll mer cha sis glück mängisch chum glaube. ich ha sgfühl so richtig glaube due ichs bi mer au ersch sit i e
buch ha ond mis chliine sehr guet spüre, es esch nämmli es richtigs ranggifüdli

bin gspannt was dini gg seid, muesch denn alles gnau verzelle

[gerbera]

Hallo dir liebe! I tue mi ize eifach ou mau ine schliche, ir hoffnig, dass dir mi ufnähmet. I ha am Sunntig positiv teschtet, und sit denn isch dr strich jede tag stärcher worde, steue de ou no es bild ine, ha aber kes gmacht, ds erschte isch no ir andere Gruppe

S isch no mega früeh, aber i ha ämu fang es rezäpt für Stützstrümpf la mache, (Zwüschefrag, het öpper erfahrig mit Chrampfadere? U nütze di strümpf überhoupt öppis?)

und mi erscht FA Termin isch am 27.02… denn bini de scho 7+2, me sötti also de scho öppis gseh, dänke ig...

[Talulah]

Guete Morge mitenand

@kizank: we gaz üch? hender üch wieder chli chönne erholä?

@awe: schööön, s freut mi richtig isch bi dier und em Buuchbewohnerli alles in Ornig!
lustig mit dim Nästbautrieb! ich han de gar nie würklich gha.

@Fea: we hesches du? muesch di immerno geluldä?

@sporty: ach ich chönt di Bricht immer wieder läse! schön isch d Freud an der Chlynä so gross. und zum Glück klappets mitem Stille jetzt au!

@Mimi: nei so schön!!! gratulierä dier vo Härze!!! ui chasch du no so lang warte, zum ihm das verzellä?! Respect!! aber isch sicher ganz en tolli Überraschig für ihn am Geburi!!

@me: han hüt Abig zum letste Mal FA Termin, nachher gaz den id Kontrolle in Spital. Bin seeeehr gspannt, bim letschte mal (vor 4 Wuche) wärs vode Grössi und Gwicht scho 10-14 Tag witer xi... Aber er hed denn no xeit, villicht wachsts ez am Schluss nümme so fest.

wünsche allne es schöns Tägli!

[Kizank]

Nomol ganz härzlechi Gratulation a d Gerbera und d Mimi!
Hoffe, die andere wo no am warte sind, händ au bald gueti News!

@Gerbera: mini FÄ het gseit, d Strümpf nutzed nur gäg d Symptom (wasser i de Bei, schweri Bei), gäg Chrampfadere cha me nüt mache. plus, damit si funktioniered mues mers konsequent verwende. Also au im Summer... Sälber hani nur im spital nach em KS müesse weli träge, ha aso ned würkli Erfahrig.

@fea: lang nüt me ghört! Ich hoffe, bi dir isch alles OK? Vilicht hebsch du jo scho dis schätzeli im Arm...

@Talulah: hei, du bisch au bald so wit! Alles gueti für de Endspurt! Lah di ned verwirre mit de Grösseaagabe - so genau stimme die eh ned. bi mim hets gheisse, er sig scho eher gross, bi de geburt isch er 3kilo gsii bi 48cm...

@Mimi: Läck, ich hetti die Geduld ned reschpäkt. Super Geburtstagsüberraschig!

@roehrli: Danke vil mol! Hoffe, du chasch di au bald id schwangere-reihe iireihe!

@me: Ha mi langsam erholt. Sit i vo de Schmerzmedis wäg bi, gahts mr besser. Mit em Stille klappets leider immer nonig rächt. chan ihn zwar mit Hüetli aaseze, aber es het ned gnue Milch, au weni no abpumpe. Aso hani momentan e riese gschiirete mit aaseze, muetermilchschoppe, pulvermilchschoppe, in schlaf wiege, abpumpe, züg uswäsche... Locker 1.5h pro mol woner hunger het.
weiss noni rächt, wien i sell wiitermache. Langsam gib i d Hoffnig uuf, dass mit em stille no richtig klappe chönnt...

[Awe]

Hoi zäme

@gerbera: gratuliere au nomol wells so schön esch super besch jetzt au im forum ond ich freu mi ufs bildi vom test, luege das emmer gern a
wäge stützstrümpf chani der leider gar ned wiiterhälfe. ich han weder krampfodere no schweri bei, oder öppis i dere art.
bin scho gspannt was du brichtisch vom 1. untersuech. ich han mine bi 7+0 gha ond mer hed s'herzli scho ganz guet ghört pöpperle

@Talulah: oh so schön, bald gets au bi der babynews ich bin jo zimmli genau e monet hinder der ond min nächschte untersuech am 6. märz esch sovell ich weiss au de letschti bim FA duesch denn brichte wies gsi esch ond wie gross dis schätzli scho esch.

@Kizank: schön muesch kei medis meh neh ond es goht langsam ufwärts. ich hoffe das metem stille klappet au no bald einisch, damets du bitz ruhiger hesch.

@fea: wie gohts der? scho s'bebé im arm?

@me: wie gseit emmer no nestboutrieb min gg hed mich jo kürzlich metere sälbergmachte holzwiege öberrascht ond geschter hani metem schwiegermami döfe go d'stöffli ussueche, sie dued eus s'inneläbe met matratze, vorhang, etc. schänke wird richtig schön s'bettli esch au bald bereit ond jetzt machi die täg de no es schöns wandtattoo here.
ond ich schlofe soo guet momentan, weiss ächt nüme wenni s'letschtmol uf ha müesse i de nacht.

[gerbera]

@awe: wenni darf useläse, de wetti genau so ne schwangerschaft wi du, das schint ja ds loufe wi am schnüerli MErci für ds willkomme heisse!

@talulah: wünsche dir no viel Glück u chraft ufem ändspurt.

@kizank: merci viu mau! Ja weiss ou nid so gnau, probiere mau, obis überhoupt ushalte se ds trage… U hoffe du chasch no richtig afa stille, isch ja mängisch es rächts züg, bises klappet, hani scho meh ghört.

[fea]

Tatsächlich nägschti Baby-News!!

Unseri Tochter isch vergangene Fritig uf d Wält cho!! Sit gescht Zobe sin mir glücklich und gsund deheim! Die vergangene Dääg sin aber sehr sehr schwierig gsi für uns. Nacheme turbulänte und plötzliche Geburtsiistieg, emene schreckliche Morge und emene drus folgende Notkaiserschnitt het die Chlini e schwierige Start ka mit Problem bim Schnufe und schlächte Bluetwärte. Si het miesse uf d Neonatologie verlegt wärde und die 2 Däg Trennig sin d Höll gsi für mi. Dr Verlauf isch aber nochär bi uns beidne super gsi und ebbe, jetzt simr deheim und eifach nur happy!