Frühlings-Kinderwünsche - wir haben's geschafft

[Kizank]

Sali zäme!

@fea - schwirig... Ich tippe mol uf Meitli. Zwar hani au prima Huut und normali Haar, aber de Reschte isch mir unbekannt, also tippi eifach mol ufs andere Gschlecht wie bi mir

@me: Stillchüssi isch am Fritig aacho. Soo e super Sach. Schlafe demit dütlich besser. Bi jetzt es bitz verchältet, drum uf hüt schlächt gschloofe, aber s Chüssi isch e super Stützi. Han s Theraline, relativ gross und wie e Banane gformt. Nims amigs hinder mich, so drüll i mi im Schlaf ned unbewusst uf de Rugge, und cha trotzdem s Gwicht chli unterschidlich verlagere bi Bedarf. Das mit em uf de Rugge drülle isch glaub s Problem gsii, dasi amigs verwachet bi, wills mr de d Luft abdruckt het. Cha eu so öppis also scho Während de SS wärmschtens empfehle!

[fea]

@ Gschlächt: ich wart jetzt no uf dr Tipp vodr Sporty, denn sagis aber zur Zyt stohts jo glaubs ziemlich 50-50...hihihi

@ me: ich ha e suuuper Weekend hinter mir (bi uf dr Rigi gsi, ha au mega guet möge uffe laufe und so) und hüt e total schlächte Dag. I weiss amigs eifach nid vo was das abhängig isch..mir isch hüt sit em Morge schlächt, mittlerwile so richtigi Magekrämpf, vilicht wieder Magnesiummange..bi nämlich au mit Beikrämpf ufgwacht znacht...

i ha userdäm grad erfahre/entschiede dasi mini Stell wird künde...also i ha zwei Aastellige, die einti (jewils am Samstig) bhalti...die anderi wäri gärn bliebe no mit 20% aber mini Chefin het sich für e Minimum vo 40% entschiede, also isch dr Fall für mi klar...

[Kizank]

@fea: du ich ha au biz chrämpf i de Wädli gha. Isch de mit Magnesium wägg. Cha guet sii, dass da dra lit. Schad chasch a dere Stell ned bliibe Mich düends sogar ersch mit mindischtens 50% bhalte... Chasch bi de andere Stell chli uefahre? Oder isch das öppis, wo fix nur am Samstig isch?

[fea]

@kizank: die Stell am Samstig isch 30% ufs joor verteilt...isch chli speziell...während de Schuelsemester jewils nur dr Samstig 7,5h, also nid mol ganz 20%, defür während de Schuelferie denn möglichst viel, eifach so viel ich cha leischte...bis jetzt isch das rächt guet ufgange mit de 30% im Joor...und ich dänk mir wärdes au witerhin so chönne organisiere da mi Maa rächt flexibel isch bim schaffe und zwüschedure guet mol cha e Dag zusätzlich frei nä...
uffe kani aber vo däm här nid...da mi Maa aber uf jede Fall nur 80% wott schaffe und 2 Dag ufs Chind luege (was ich au guet find und unterstütze möchte), wird ich also für dä zweiti Dag wonär denn no deheim isch mir no öbis organisiere...

[sportyspice]

uiuiui... ha chli müeh mitem Internet. Es funktioniert momentan eifach nie recht bi eus, drum hani nie zrugg gschriebe. Aber im Moment hani grad glück drum los... alles los schriebe was i wett.



Danke vill mol für die liebe Wort betreffend euserer Karte, bi momentan fliessig dar, jo isch e biz e ufwändigi Sach- aber i ha e riese freud. Muess ca. 60-70stk. mache. Couvert sind die meischte echo agschriebe.

@Fea: uiuiuiui... das nimmt mi jez aber richtig fescht Wunder... hesches doch nid möge dure zieh mi wundere.
I gib nid viel uf so Märli Wege Spitzembuch oder so, aber wenn meh die Sache müessti Düte, denn würd ich wahrschiens uf Grund vo dem wo i do letschti z Ohre becho han,denke es gäbti e Bueb.
Und??? Spann eus nid so uf d Foltere. Raus mit der Sprache. Bin enorm gspannt- wie e Regenschirm.

Wer weiss s Gschlecht eigentlich scho alles? und wer lost sich wie mir loh überrasche?

@ Kizank was gitts eigentlich bi euch? Du weisch es au echo, oder? Gisches Pries????

Hahaha, i ha hüt gmerkt, dass i momentan zwar nümm so sportlich fliessig bin, aber immerno sehr e Sportlerherz ha, i rechne alles in Marathondistanz um, i gseh au die ganzi Schwangerschaft als Marathon, ha mi hüt ertappt, dass i mir überleid han, bi wellem Kilometer i momentan bin... i denk Kilometer 18... do isches no agnehm, dr respekt vor de letschte Kilometer isch zwar do, aber glich sind d Bei etc. no guet. Klar bi au mittlerwile in dr 26 ssw. also mehr als d Hälfti, aber i denk s härtischte chunnt jo au zum Schluss- dass denn d Glückshormomusschüttig drfür umso grösser isch, wenn das chline Buchbewohnerli endlich do isch.
Einmal Sportlerin, immer Sportlerin... mi Maa het nur glache.

Liebi Grüess durchs Netz, d Baschteltante.

[fea]

Willkomme zrugg liebi Sporty

mi buuch het vor paar Minute grad mega umetanzt, so lustig und härzig, ächt. Ich has sogar chönne filme und per whatsapp em zuekünftige gotti schigge hihihi

hüt hani e bessers gfühl für dä dag, irgendwie fühli mi sehr munter, schlächt zwar e chli aber i hoff durchs zmorge verschwindet au das



ah und jetzt natürlich s wichtigschte

mir bechömme es TÖCHTERLI )))))))) <3 <3 <3

naja, vorusgsetzt natürlich dass d Vorussag vom Gyn stimmt

[Awe]

Guete Morge liebi Fraue

@fea: jööööö es meitli, herzig gratuliere also ganz herzlich
hoffe du hesch hött ganz en guete tag

@sportyspice: mer lönd eus au lo öberrasche

@Kizank: guet esch dis stillchüssi cho ond super bringts der so vell för en guete schlof ich wird
mer bi ziiite secher au mol eis poschte

@me: mer gohts super, geschter obig mol no schnell 10 min. schlächt gsi aber susch tip top.
hey ich han e frog a eu wo scho wiiter send. ich han sit öppe e woche sgfühl ich merki wenn s'baby
aktiv esch. also ich merke ned s'chliine sälber aber denn ziehts oder sticht emol ond denn gets tagesziite
woni gar nüt gspüre im buuch ond de hani sgfühl es schloft. esch da möglich, jetzt scho? bin jetzt endi
14. ssw

[Kizank]

Guete Morge mitenand!

@fea: hah! Ich ha richtig groote! Bi mir gits en Bueb, und wien i gschribe ha ussert de Huut wo guet isch und de Hoor sind mir die Sache wod gschribe hesch nöd so gsii. Mir isch nie richtig schlächt gsi, höchschtens mol bizzeli flau. Bis me s Büchli gseh het, isch au lang gange, wobii ich jo au 6 Kilo abgno ha die erschte 20 Wuche, aber eigetli chum Buchspäck gha ha. De Buuch isch glaub sehr individuell, wie schnäll me de gseht.

@Awe: Was du gspürsch (zieh und stäche) chönd au dini Bänder sii, wo sich no am aapasse sind. Die erschte Baby-Bewegige sind ganz, ganz fiin, wie wennd mit eme chline Pinsel über de Buch striiche würsch, oder würsch stupfe. Ich ha als erschts d stupser gspürt, aber au die sind nöd es Stäche gsii. Mit de Ziit hani den gmerkt, wie s Baby chräftiger worde isch - weisch, es isch am Aafang gar ned starch gnue, dass es dir chönnti weh tue.

Edit:
Mol no min Ticker korrigiert. Isch es biz denäbe gsii irgendwie.

[fea]

@kizank: jo ich glaub ebbe überhaupt nid an die orakel-gschichte..ich dänk dass es absolut zuefall isch (oder vo anderne Sache abhängig) wie dr buuch usechunnt und welli symptom me het...

@kindsbewegige: ich ha au als ersts s stupse gspürt...für mi isches aber gar nid gsi wie e "Pinselstrich" sondern s het sich eher agfühlt wie dr puls...am aafang hanis nur gspürt weni flach uf dr rugge gläge bi und mini Hand unterhalb vom buuchnabel richtig inedruggt ha..denn gspürsch jo swieso dr puls...und zwüsche dure hets denn eifach so wie chli e stärkere Pulsschlag resp. halt au unregelmässig oder anere andere stell wie dr richtig puls...ich has rächt lang nur gspürt wenns wirklich gege d buuchwand gingt het (so dänki ämel) und erst mit dr zyt au wenn sichs sunst bewegt het oder eifach gstraplet oder so...
tja und mittlerwile gits regelrächti parties in mim buuch s isch aber nonig schmärzhaft oder so und ich würd au nid devo verwache...aber s isch luschtig, v.a. will mes vo usse gseht

[Kizank]

@Kindsbewegige: Wow, öpper missbruucht mini Rippe gad als Punchbag... So wie d Fea hanis nie probiert - ich ha mi uf d Bewegige bezoge, woni 'vo sälber' gspürt ha, ohni bewusst go drücke und sueche.

@Neus Dihei: Händ en Husarzt gfunde, wo denn au gad s Baby mit uufnimmt. Das isch scho mol erledigt. Dunschtig inere Wuche werded d Chuchischränk gliferet, dänn dörf GG mol sich dra mache, eusi Chuchi zämezschruube. Wenn das gmacht isch fehlt no d Arbetsplatte drufmache, und d Elektrik und s Wasser aaschlüsse loh. Zum Striiche fehled nur no d Ibauschränk (evtl mit ere spezielle Tapete zersch, damit d Farb hebet) und 3.5 Wänd vo de Stube (Isch "L"-Förmig). Denn no d Böde mache lah, und mer chönd afo zügle. Biz Arbet gänd no so Details wie s WC striiche, im Bad d Fuege no fertigmache, neu Sicherigschaschte, aber das gaht zur Not au no nach em Zügle. Im Momänt wäri eifach froh, wenns bald gschafft wär. Möcht nöd erscht zügle, wenn s Baby da isch...

[sportyspice]

@Fea: Juhui, so cool e Meitli... hehehe... jo i denk so Märli hei nid viel wohres, bisch jo dr lebigi Bewies. so COOL. freu mi ganz fescht mit dir.

@Kindsbewegige: Hm, i ha das au sehr sehr früeh gspührt. ab ssw14 isch so chli gsi wie es Flattere... ganz Fein.
Mittlerwile gspühr i euses chline täglich und natürlich hani au s Gfühl es het scho biz e Rhytmus entwickled.
Isch aber immer no sehr fein und überhaupt nid unagnehm... finds wunderschön. au das wie d Fea gseit het mehs richtig vo usse gseht und natürlich gspührt sich wunderschön.
Hüt isch euses wieder mol sehr aktiv gsi... mängisch hani au s Gfühl es reagiert uf Gfühl. Wenn i mit mim Buchbewohnerli alleini bi und schwätz, denn stramplets amigs ganz fescht. findi super.

@Kizank: ohja, das Verstand ich guet... das würd mi au biz stresse. Mi stressts scho, dass i momentan s Gfühl han i müess no einiges bsorge fürs Chline, obwohl mir no sehr viel Ziit hei... aber irgendwie isch bi mir dr Neschttrieb sehr früeh scho vorhande.

@Awe: juhui, gäll isch ebe au no cool, wenn meh nid scho weiss was es gitt.

[Tiare29]

ich schliiiiich emol ganz vorsichtig bi eu ine han hüt morge positiv testet.. zwor no gaaaaaaaanz fiin aber dütlich positiv *freu*

[Kizank]

Jenny!!!
Sooo schön!!!
Gratuliere!!!
So schön! Nei hee ich freu mi für dich!!
*umarm*
Wünsche dir scho mol alles, alles Gueti!!

[Tiare29]

@kizank
danke kas no gar nid richtig glaube.. ha mi gester so mensig gfühlt dasi hüt morge nie im lebe miteme 2. strich grechnet han aber ich bin überglücklich und i bi soooooo froh dasis do ka useloh.. GG weisses nämli au nonig

[Talulah]

Guete Morge

@Jenny: hey so schön! Gratuliere ganz herzlich!!! Freut mi isch ändlich öpper vom Hibbelthread is Folgethread cho! und we wetsches dim GG z verzelle?

@fea: ohh so schön es Meitli, gratulierä!

@Kindsbewegige: ich spürs sit vorletschter Wuche (SSW 18). Am ehnste wänni sitze, aber au nur wenns chlyne will. Das zieh wed Awe seit hani amel au gha, sältener jetzt no. Denke au, dass das s Usdehne vode Bänder isch. D Kindsbewegige fühled sich ganz andersch ah!

@sporty: jö das isch ja voll herzig, dass üches Chlyne so uf dich reagiert! und das mim Marathon, isch ja wohl zu geil!!

@Kizank: ohohh dis isch au voll aktiv! Wow super, bi dier im nüe dihei, da gaht öppis! Hoffe fest, dasser das alles no vorem Baby schaffed!

@me: han gester de Organ-Check gha. Alles bestens und so wes sött si. uuuuund jetzt wüssemer zu 99% au wasses git!

[Tiare29]

@taululah
aso GG wird morn oder über morn informiert de test muess no kli dütlicher sii das er das glaubt ;P (er isch en Perfektionist und muesses eidütig gseh und do er sich jo nid uskennt mueni etzt no kli warte ) han aber vor ihm es päckli zmache miteme coole Body evtl. schüeli, de ss-test und es brieflich wo in etwa drufstoht "i 9 mönet dörfsch mir das alege "
nomeh freui mi aber zums mim grosse vozelle (do mueni aber no es paar wuche ufs muul hocke) er wird usflippe vor freud

[Awe]

Guete Morge zäme

@Jenny85: ich gratuliere ganz ganz herzlich, sooo schön bisch jetzt au bi eus debii

@Talulah: und??? verrotisch es eus? bin scho ganz gspannt

[Kizank]

Hoi mitenand

Puh ha ich schlächt gschloofe. Glaub nie 2h am Stuck... Ha mega Hitzewallige gha, und de het biz weh ta und Baby het gfunde, wenn s Mami scho ufhockt, dänn mache mer doch gad mol Turnstund... Ich freu mi wänns da isch, git zwar i de Nacht ned meh Schlaf, aber wenigschtens die erschte Wuche chani mi Tagsüber au mol no ufs Ohr haue...

@Talulah: schön isch alles guet mit de Organ! Ha de säb Ultraschall mega gnosse, will de FA au immer schön erklärt het, was me gad gseht und so, und wie das alles afoht zäme z funktioniere. Isch eifach wahnsinnig, was für es Wunder es Chind isch (oder eigentlich au alli Tierbabys etc...).

@Jenny: Uii, meinsch da freut sich öpper, dass er grosse Brüeder wird? Het er mol gfrooget (weiss gar nümm, wie alt er isch)? Du, ich ha mi im Fall am vortag vor em Tescht au total mensig gfühlt - ich dänke, wäg de Bänder wo scho agfah händ, sich z verändere. Im Nachhinein, woni de positiv Tescht gha ha, isch mr de scho klar gsii, dass das Gfühl amigs länger aahaltet, vor TR chunnt, aber im Moment selber chame das nöd iischätze.

@Gschlecht: Ich ha mir ja en Bueb gwünscht, GG es Meitli ("Hoffentli gits es Meitli, wo so wird wie du, ned en Bueb wo so wird wien iich"). Aber jetzt freut er sich au total, dass en Bueb git. Chunnt immer wider mit Ideene was er alles mol mit "siim" Bueb machä will. Eb er nach mir oder GG chunnt gsemmer ja denn no, mir sind beidi biz spezielli (händ eus drum im Vorus scho Gedanke gmacht, eb mer würkli Chind wänd), aber händ da sälber au dure müesse, und chönd oisem Chind de sicher guet zur Siite stoh, wenns di gliiche Useforderige erläbt.

[Tiare29]

@kizank
jooo de gross isch 8i und de kli 4.5 sie wüssed das mir es Baby wänd und de gross hät fang jeeeeeede tag gfrogt öbi etzt endlich es baby im buch han.. und wenn de klii uf mir umeturnt isch hätter ämel gseit „nöd so fest weisch falls doch es baby drin isch“ sit 2 wuche weisser das sis gotti schwanger isch und etzt findet er das ka doch nid so schwer sii

@gschlecht
i ha jo 2 buebe und ich hoff jetzt würklich meeeeega uf e Prinzessin (natürlich isch s'wichtigste Immer hauptsach gsund

[sportyspice]

Hallo dir fliessigi Mamis.

@Jenny85: willkomme bi eus, freu mi sehr mit dir, dass es bi euch klappt het und wünsch dir e gutei Kugelziit.

@Talulah: oh, verzähl mol... was gitts bi euch? wow, es sind wirklich mega viel wos Gschlecht wüsse. I ha immer denkt mir wos nid wüsse, sige in dr Überzahl, aber mini FA het gseit die sige hüt sehr rar.

@Kizank: UIuiui, hoff hesch e guete Tag gha, trotz schlofmangel.
I schlof momentan sehr sehr guet, sogar no ufem Rugge und ohni Stillküssi und anderne Hilfsmittel, merk eifach das i nümm ewigs cha schlofe... will i suscht Ruggeweh bechum. I glaub i bi mittlerwile froh isch euses Buchbewohnerli e chlises, i glaub es het e paar Vorteil. Ha zwar langsam au e Büchli wo nümm übersehbar isch, aber i glaub für dr Ziitpunkt no immer e chline Buch... und drum bini in vielne Sache noni extrem igschränkt.
Wie meinsch, dir sid spezielli? als Kinder? sind mir nid alli biz speziell und grad us dem Grund einzigartig und liebenswert? Das machts doch grad us...

@ME: Ohje, i ha hüt öbbis kauft, ha für mini Cousine wo e Baby becho het e gschenkli gsuecht und es isch im Manor grad halbe pris gsi bi de Babykleidli- hani eis für sie kauft und eis für euses... es isch aber nid gschlechtsneutral... aber i ha nid chönne wiederstoh es het mi sooooooooo härzig dunkt. Jetzt hani fascht e schlechts gwüsse, wills mir wirklich im Grund gnoh egal isch ob meitli oder bueb. Naja, suscht verschenk is denn halt eifach, wenns nid passt bi eus. Muess es glaub verstecke, mi Maa dreiht suscht dure, wenn er das gseht.