Am 22.11.2007 bin ich zobe ufem WC gsässe und ha genau so us dr Wösch gluegt
. Sind das tatsächlich zwei Strichli ufem Test? En absoluts Wunschkind, aber trotzdäm bin ich a däm 22.11.07 e bitz gschockt gsi. Nach nur 3 Mönet "üebe", het sich mi Schatz scho ufem Wäg gmacht und defür bin ich hüt no so dankbar.
Dr Arzt het das am Tag druf bestätigt. E süesses Pünktli isch er gsi und isch ab denn fliessig gwachse. Ich ha dänkt, ich würd zu dr glücklichi Sorte ghöre, wo d'Wc-Schüssle nid ei einzigs mol umarme muess. Pustekuchen! I dr 10. Wuche isches losgange. Ich ha 5kg verlore und es isch mir bis zu dr 20. Wuche eifach nur besch... gange. Und nach dr Brächerei isches mit iklemmti Närve im Rugge losgagne.
Ich ha ab dr. 30. Wuche nur no mit Stöck chöne umelaufe, an schaffe isch gar nid z'dänke gsi. Aber egal, mi Schatz het sich prächtig entwicklet und ich bi trotz höllischi Schmärze glücklich und dankbar gsi.
ET isch vom Arzt am 28.7.08 festgleggt worde, doch am 15.7 bin ich mit "Wehe" im Spital glandet. Fehlalarm...Mi grosse Schatz het nid chöne verstoh, wie me Blähige mit Wehe cha verwächsle und het wäge mir nur 3 Stunde Schlof gha i dere Nacht.
Aber denn, am 17.7.08 han ich um Mitternacht en anders zieh im Buuch gha. Ich ha aber mi Maa nonig gweckt, dä hätt suscht d'Scheidig igreicht wenn's nomol e Fehlalarm gsi wär.
Aber die Schmärze sind nid wäg. Ich ha sie brav verschnuft und ha das ganze bis am Morge am 4.00 gmacht. Denn isches aber würklich nümm gange und ha i dr Gebärabteilig bscheid geh, duscht, die letschte Sache parat gmacht und mi Schatz gweckt.
Er isch im erste Momänt skeptisch gsi...aber nur bis zu dr nöchste Wehe!
Am 5.00 sind mir im Spital acho. Ich mit Stöck im Gebärsaal ineghumplet. D'Hebamme het mi ungläubig agluegt und mit charmante franz. Akzänt gmeint: "aber Madame R...., für Käserschnitt sind sie viel su früüüh!"
Kaiserschnitt? Wer het öppis vo Kaiserschnitt am Telefon gseit? Ich ha Wehe im 7 Minute Takt! Ich glaub, die hett mi für nid ganz dicht ghalte.
Also het sie mir zerscht e Leitig gsetzt und Bluet für e eventuelli PDA zapft. Ich bi scho bi 4cm gsi, juhui!
Am 7.00 isch Schichtwächel gsi und ich ha mit dr Frau Langlotz die besti Hebamme gha, wo ich mir hätt chöne wünsche! Die Frau isch eifach genial gsi und het mi super begleitet. Mini zweiti Hebamme, mi Maa, het das au ganz toll gmacht. Er isch nie im Wäg gstande und het mit mir d'Wehe verschnuft und au mitprässt.
aber dezue spöter meh. 
Ich ha am 8.00 dörfe Bade. En Lavändel-Entspannigsbad...es isch herrlich gsi, aber plötzlich sind au d'Schmärze stärker gworde.
Also bini us dr Badwanne use und wieder ufem Bett ghumplet. Ich ha denn bald e PDA welle und die hani am 9.00 becho. ich bi denn bi 6cm gsi. D'PDA het leider nid so lang gwirkt wil mi Kanal "verkalkt" isch. Am 11.00 hani wieder umegschraue vor Schmärze und han e zweite Versuech mit dr PDA verlangt. Bi immerno bi 6cm gsi und das het mir gar nid passt. Ich ha mi viel z'fest verkrampft.
Dr Chefanästhesist isch denn au cho und het sini Sach guet gmacht. D'PDA isch gsässe und chum bini entspannter gsi, isches au wieder vorwärts gange! Am Mittag het denn d'Hebamme d'Fruchtblose platzt, damit d'Geburt schnäller vorwärts goht. Ich ha überhaut nüt degäge gha und gspürt hani sowieso nüt.Am 13.00 isch ändlich mi Frauearzt cho und het mi untersuecht. "Es isch alles super, am 17.00 isch s'Baby do!" Hä??? Ich bi am Mittag scho kaputt, fix und foxi gsi und er redet vo 17.00????
Mi Schatz im Buuch het das au nid toll gfunde, also hani am 14.00 Prässwehe becho.
"Frau Langlotz, ich muess prässe." "Neeeei, sie müend sicher nur uf's WC. Sie sind vor 15 min, erst bi 7cm gsi!" "nei, ich präss jetzt, es isch s'Baby."Sie het mi sicherheitshalber kontrolliert und tatsächlich! innert 15 Minute vo 7 uf 10cm! Ich vergiss das Gsicht nie meh... isch das köstlich gsi!
Also het sie mi Frauearzt gholt und ich ha ändlich dörfe prässe. Isch das en Erlösig gsi!
Ich ha prässt und prässt, aber mi Schatz isch stecke bliebe und d'Härztön sind immer wieder abgsackt.
also het dr Arzt scho d'Suugglocke füregholt, aber das het mi chli Schatz au nid toll gfunde und het sich denn doch no entschiede ohni Hilfsmittel z'cho. Und denn ändlich: am 17.7.08 am 14.56, isch mis grösste Glück gebore! Er isch total zerknautscht und schief gsi, aber das han ich im Glücksrusch nid gseh. Erst uf de Föteli e paar Täg spöter. Für mich isch er eifach nur perfekt gsi!
Nachdäm er sich alles genau agluegt het, Mami, Pappi, EKG Kabel, het er au zum erste mol gschraue. S'Glück wo mir verspürt händ, isch gar nid z'beschriebe....eifach es Wunder!!!
Dr stolzi Pappi het vo Hebamme und Arzt viel Komplimänt becho. Er isch mi Ruhepol gsi und das obwohl er genauso ufgreggt gsi isch wie ich.
Hüt isch mi Schatz scho es Spielgruppechind und er wünscht sich es Schwöschterli. Mol luege, vieleicht gits jo als Wiehnachtsgschänkli es Ultraschallbild.
