nonig mal 5 Täg besch alt... ond doch häsch dech scho z'mizt i üsi Familie "drängt" als ob du scho emmer zo üs ghört hädsch!
Din Wäg zo üs häd mitti August agfange...
Nichts ahnend häsch du dich zo üs gschliche... völlig perplex beni gsi won ich ir Nacht vom 29. ofe 30. August im Laurin si Geburichueche han welle bache onds mer sooooooooooo öpis vo schlächt worde isch! 
Han den die ganz Ziit dänkt...das chan doch ned sy...
Drum hani am 30. am morge früeh de SS-Test gmacht... ond siehe do dä häd also so öpis vo positiv azeiged! 
de Papi ond ich send ganz schön verschrocke... vorallem do ech mitti Monet met de Pille agfange han... ond för üs klar gsi isch das es ir nöchst Ziit keis 3. Bebeli wird gäh do ich eigentlich miini Schuel weder in Agriff han welle neh ond ändlich de KV-Abschluss nochehole!
Aber Nei! Ergendwie häds sich, dass sich üsi Chend dä Wäg zo üs sueched egal öb mer wennd oder ned...!
Emmel d'Mehrheit... met de Ziit händ mer üs a de Gedanke gwöhnt ond händ üs emmer meh drüber gfreut das mer das Wonder doch nomal dörfed erlebe... wo mer üs zwar so fescht gwönscht händ aber us "vernunft" verschobe händ.... 
d'SS esch zemlich problemlos verlaufe... ir 13. SSW hani zwar ofsmal Bluetige becho wo mer den au sofort send is Spital goh zeige...aber noch afänglicher Panik vo wäge Plazenta preavia häd sich das ganze doch ziemlich "entwarnt" bimne nöchste Untersuech äs paar Täg spöter!
Wos den langsam gäge Termin (1.5.07) zuegange isch send mer notürlich emmer ongeduldiger worde... ond send ganz gspannt druf gsi WENN das du dich entscheidisch de Wäg zo üs z'gfinde!
Mer händ die letschte Wochene aber au ganz intensiv us 4 Chöpfigi Familie gnosse ond no velli tolli Sache onterno...
Do's bereits 4 Woche vor Termin gheisse häd das de Mumu ganz weich sigi ond de Gebärmuetterhals komplett verstriche händ mer gwösst das du JEDERZIIT chansch cho... aber au us Erfahrig vom Laurin her gwösst das es no EEEEEEEEWIGS chan goh!
s'Einzig was mi de chli möge häd isch gsi woni wieder all die Vorwehe gha han... notürlich emmer z'Nacht dasi ja nöme han chönne schloffe... ond wirklich äs paar mal s'Gfühl gha han äs gängi los...
Aber nix da... du häsch dir Ziit gloh!
De ganzi 28. April düre hani sogar emmer weder äs liechts Weh verspürt... so das ich doch äs paar mal han mösse bi üsem LUGA-Bsüechli ahalte do ich nöme han chönne wiiterlaufe... leider isch's ned meh worde aber au ned weniger... nochhere relativ ruhige Nacht ischs am 29. wiiter gange... met dene doofe Wehs... wo Weh gmacht händ ond doch ned ergendwie rechtig Geburt dütet händ... 
De Alessio ond ich send denn am Morge schnell id Stadt id Aphotek goh Medis hole före Laurin wo grad d'Spitzeblottere becho häd! Ond am Nomi nomal ad LUGA alles emmer schön met "Wehe" begleited....
d'Nacht vom 29. ofe 30. isch den alles anderi als Erholsam gsi...de Laurin häd so glitte ab sine velle, velle Blötterli ond häd fascht die ganz Nacht emmer weder brüeled... ond wenn er ned brüeled häd so han ich Wehe gha... emmer schön im 15 Min. takt... aber äbe... ohni das sie chürzer worde wäred die Abständ!
Bin die Nacht 2 mal id Badwanne aber denkste... am 4i hanis komplett ufgäh ond bin "ufgstande" s'Weh isch zwar emmer stärcher worde vo de Schmerze här aber d'Abständ send nie chörzer worde ond doch han ich mir afange öberlegge is Spital z'goh... do ich gwüsst han das am 30. eis Chaos entstohd wenn ich öper för d'Buebe brüchti do ALLI met ehrne Monetsabschlüss im Gschäft so igspannt gsi send...
(mer kenned eidütig z'vell Lüüt wo of dr Bank schaffed ) Drum hani den wirklich scho am morge am 6i ir Eliane aglüte zom fröge öb sie sichs irgendwie chönti irichte... esch notürlich eis zügs gsi do ja ebe de Laurin d'Spitzeblottere gha häd ond d'Eliane ned eifach häd chönne de Seya ond d'Yael met do häre neh!
drum häd sie denn glueged das sie öper för die zwei gfinded damit sie üs häd chönne us de Patsche hälfe!!! Was mir ihre notürlich nie, nie, nie, nie, nie wärded vergässe... !!! d'Petra isch denn schnell cho d'öberbröckig spiele am morge... damit mir bereits is Spital händ chönne ond häd ofe Alessio ond de Laurin glueged bis d'Eliane cho isch. Mer send aso of die halbi 8ti im Spital itruudled total ned in Gebärstimmig aber halt doch eifach met dene doofe Wehe wo mer ned häd chönne ignoriere...
Zerscht händ mer mol eifach mösse warte...anschiinend händ sich no äs paar anderi Babies das Datum usgsuecht...
ergendwenn send mer den mol empfange worde ond ine Gebärsaal gfüehrt worde. Zom Glück eine met Badwanne trotz dene velle Geburte! 
Dete bini den as CTG aghänkt worde...das häd au ned meh verzellt als mer scho gwösst händ... ca all 10min. äs Weh. Diini Härztöndli send äs bitzeli höch gsi aber ned besorgnis Erregend!
d'Hebamme häd aso au gmeint ich gsäch ned so us als ob ich nöchstens wörd gebäre...
Den beni Untersuecht worde ond dete häd de Befund gheisse 4-5cm eröffnet de Mumu schön weich...
d'Hebamme häd denn gmeint das sie mich met dem Befund nöme weli heischicke well wenns den ihänki chöings den aueg zemlich schnell goh! Drum wördi sie üs vorschloh das mer blibed ond sie probiered d'Wehe met Alternative Methodene azrege!
Do beni notürlich meh wie iferstande gsi...well so wiitermache hani of keh Fall welle!
Mer händ welle Resulat gseh! Aso ben ich ab dem Moment met Wehetee ond x verschiednige Chügeli "ideckt" worde. Us erschts send de Papi ond ich den grad no goh spaziere...wells mer det debi eifach am wöhlste gsi isch! Ond mer no öpis chlises händ welle goh z'mörgele, well gässe händ mer ja beidi no nüd gha!
Wo mer den retour cho send isch nomal äs CTG gmacht worde wo doch scho intensiveri Wehe azeiged häd... obwohl ich nonig gross en Onterschied gmerkt ha...
was mir notürlich Rächt gsi isch... Dene isch d'Ärztin före U-Schall cho... mer händ sogar no äs Bildli vo dim Füessli mit Zeche becho! Wells grad so härzig us gseh häd... ond sie häd dich aso of 3600 Gramm gschäzt. Alles isch beschtens gsi ond äs hät aso nome no mösse rechtig los goh!
Zom Ziit vertribe ond Wehe arege send mer dene nomal goh spaziere... zom Hirschpark abe... ond dete hani so s'erschtmal gmerkt das es jetzte los gohd!
Han schön miini Wehe mösse verschnuufe...was notürlich all Lüüt dezue bewoge häd üs azluege!
Ond so händmer aso no x Gueti Wünsch met ofe Wäg becho... Noch ca ere Stond send mer weder retour gsi... ich han zwar gmerkt das sich öpis tued... ond doch hani s'Gfühl gha dasi so ned wirklich chan gebäre... isch mer eifach vell, vell z'guet gange zwösche de Wehe...
d'Hebamme häd den nomal de MUMU kontrolliert... ond äs bitzeli hoffnig han mer ja doch gmacht gha well wehe hani ja trotzdem gha!! Aber die gross Entüschig isch cho... d'Hebamme häd genau 5cm ertastet!!!
Super... i dem Moment hätti am liebschte de "Bettel" häre grüehrt ond wär weder hei...
Äs isch halbi eis gsi mer send sett 5h dete gsi ond so z'säge nüd wiiter...
d'Hebamme häd denn gmeint das mer rein vom Befund här scho met Wehemittel dehinder chöinged wenn mer das welled... aber au das es ja ned pressieri well dir gängs guet ond äs bestöchi keis Infektionsrisiko do jo d'Fruchblase no ganz sigi!
Aso händ mer den eifach abgmacht das mer de Schichtwechsel am 2 abwarted ond denne entscheided.
Mer händ dene no z'Mittag gässe...sprich meh de Papi den irgendwie häd i dem Moment met de Wehe afoh ihänke ond ich han eifach zwüsched düre en Gable gstipizt...
Han den so rechtig gmerkt wie miini Energie schwinded ond ich nöme mag... han drum gfröged öb ich ächt dörfti id Badwanne well ofs Bett ligge hani onmöglich chönne! Das häd so höllich weh gmacht det drufe... ond das ewige omegelaufe häd mer afang of d'Närve gäh...
Drum händs denn s'Wasser usegloh ond am viertel ab eis bin ich id Badwanne ghöckled... dete enne ischs mer rechtig guet gange...
d'Wehe send weniger oft cho! ich weiss kontra Produktiv... ABER HÄD GUET DO! Wenni deför eini gha han esch die aso scho so rechtig intensiv gsi phuuu...allerdings häds no glänged zom met em Papi zwüsche dine scherzli z'mache... Ir Hebamme muen das eh komisch ie cho sy wie de Papi Ziitig gläse häd ond mer zwüsche de Wehepause öber x Sache diskutiert händ!
Aber hauptsach isch ja gsi das üs wohl debi gsi isch... ofsmal häds denn afoh ahänke... ond äs häd afoh vertami weh mache...
phuuuuu i dem Moment hani nome no dänkt... "Ja macht genau no so weh wie die letschte mal.... " d'Lehrhebamme häd denn ir Hebamme gschälled ond die isch mal goh luege ond isch glaub grad chli verschrocke... anschinend send mer bi 9cm gsi ond äs isch nome no äs süümli ome gsi... keis wonder han ich s'Gfühl gha ich heig Pressdrang!
Bin den "zwunge" worde äs Kalzium-Gsöff z'trinke... super zwüsche de schlimmste wehe enne häd mer das d'Hebamme fascht i trichtered...
bim letschte Schluck hani denn doch no use brocht "JETZT NED" d'Schmärze i dem Moment send onbeschrieblich gsi... vorallem do ich ned han dörfe presse sondern emmer met dem doofe schhhhhhhhhhhhhhhhhhhhhhhh verathme... glaube han imne Bahnhof voller Damloki konkurenz gmacht ond än chorze moment isch mer im Alessio si DVD vom Thomas der Dampflok i Sinn cho... hätt sicherlich d'Hauptrolle becho bim nöchste...
Ergendwenn isch denn das erlösende jetzt dörfed sie langsam afoh mitpresse cho........
Do de Schmerz vom Chöpfli so schlimm gsi isch hani alles gäh...denn us Erfahrig hani doch gwösst dasi do döre muess ond de rescht easy isch...
*denkste* s'Chöpfli händ mer denn gschafft gha... miini Hormon händ scho de Höheflug welle aschloh bisi gmerkt han das es ned wiiter gohd!
Das isch die letschte mal aso ned so glaufe!
d'Hebamme häd das anschinend au gmerkt häd gmeint ich mössi ufstoh....
Super!!! Än Chopf zwüsched de Bei ond mösse ufstoh????? Also ergendwie bini den ufe cho... zom Glöck häds zwöi Ärztinne im Zimmer gha die send die beschte Stüztgriff gsi....
Froge mech jetzt no werom om Himmelswille die ned ergend es Seil oder weiss ned was ob de Wanne händ för sertigi Fäll????
Of all Fäll send mer denn vor die nöchst Herusforderig gstellt worde ich mössi s'Becki noch före kippe... häääää????
Naja hans immerhin probiert... anschinend häds gholfe... well am 14.11 Uhr am 30. April 2007, liebe Joel bisch du doch no komplett us mer use cho!
besch ganz blau gsi ond häsch ned brieged...
do ich gstande bin han ich dich ned grad chönne zo mer neh.... ond leider häsch du anschinend ned rechtig gschnuufed...de Papi häd no schnell diini Nabelschnur dörfe düre schniide ond schwuuups sends met dir zom Wickeltisch gange wo du dene abgsoge worde bisch ond suurstof becho häsch... ich bin während dere ziit us dr Badwanne of s'Gebärbett zügled ond han of dich gwarted...bald scho häsch zo mir dörfe...bisch zwar än ruhige gsi! ond häsch grad pfuused ond ned ome glueged wie diini Brüedere aber dir ischs guet gange ond das ischs wichtigste gsi!!!
Im nochhinein isch das ganze än rassigi "schöni" Geburt gsi! Lang liide hani ja ned mösse...
Han mer vorgnoh ned z'fescht öber "s'ändi" truurig z'sy wos den nöme so Rund glaufe isch... sondern eifach nome dankbar z'sy das mer dech dörfed bi üs ha!!!
Ben au dasmal dankbar gsi das di Papi mich unterstüzt häd... au wenn er vor luuter Sudoku ond Krüzworträtsel fascht ipfuused isch...
Aber en bessere Wäschlümplibringer ond Kalziumgsöffheber gehts halt emmer nonig!
Au met der send mer 4h nach dr Geburt wieder hei zuegfahre... ond händ en riese Empfang vo dine Brüedere gah... de Moment wird ich glaub nie i mim Läbe vergässe... du besch bestuunt worde ond abgschmützeled... verstreichled ond verknuddled besser häds aso ned chönne laufe....
de Papi ond ich händ denn de Alessio ond de Laurin i ihres Bett brocht ond gsonge wäred dem dich diis Grosi vollerstolz bibäbeled häd...
Du gsehsch chum of dr Wält ond doch scho voll ir Familie!
alles liebi chline Joel
diis Mami
