Claudia gsi zum Znacht und sind u spat hei cho und dänn han ich am Morge am
2 wie agrüert Schüttelfrost becho und isch mer u schlächt gange. Isch mer au
wieder schlächt gsi und ich han scho Angst gha, dass ich die Chotzgripp
wieder bechume. Han dänn immer meh zitteret und bin dänn id Badwanne was zum
Glück ghulfe hät. Isch u komisch gsi und han das au no nie gha vorher und
han mi eifach nüme chöne beruhige.
Dänn am Morge am 9.15 hani grad woni ha welle ufstah gmerkt dases nass wird
bi mir im Bett.........fühlt sich a wie wänn mer würd id Hose mache. Dänn
bini uf und ha dänkt "aha" so isches wänn d Fruchtblase platzt und han u
Freud gha gahts endlich los! Bin dänn de Beat go wecke und ha zu ihm gseit
"musch ufstah, du wirsch glaub hüt Papi"
Han dänn mal im Spital aglütet und die händ gmeint mir sölled eifach mal cho
ide nöchschte zwei Stund. Wehe hani ja keini gha. Han dänn packt und de Beat
hät no Zmorge gässe und bin umeghüeneret wie blöd, bin mega nervös gsi!
Tja und dänn simmer det gsi und sie hät mich untersuecht und sie sind dänn
lang nöd sicher gsi, obs Fruchtwasser isch, wells bim Ultraschall no gnueg
Fruchtwasser gha hät. Ich bin zwar felsefest devo überzoge gsi dases d
Fruchtblase gsi isch.
Sie händ dänn am Schluss nach öppe 1.5 Stund Untersueche en Test gmacht wo
eidütig nache wiist öbs ebe FW isch und es isch dänn effektiv gsi.
Sie hät dänn gseit es müsi en höche Blasesprung si, aso dases nume quasi en
Riss hät und durch das no en Reschte Wasser drinn isch.
Im Normalfall wartet mer bime Blasesprung 24 Stund bises vo allei los gaht,
aber well ich Streptokokke B positiv bin händs gseit mir sölled no biz go
laufe zum luege öbs nöd doch vo allei los gaht und dänn uf die halbi 6i
wieder cho.
Mir sind dänn in Mäc go ässe hihi und natürlich isches mir bländend gange
und so simmer halt dänn am Abig wieder iigruckt.
Sie händ dänn am halbi 6i afange mit Iileite und am 6i hani s erschte Mal Penicilin becho gäge d Streptokokke.
Tja und wieder isch warte agseit gsi. Nach ere halb Stund hanis dänn langsam
afange merke wie so mensartigi Schmerze agfange händ.
De Beat isch dänn mal no hei go Znacht ässe well ich ja scho im Spital öppis
becho han. (Hät Lachs geh wells ja Silvester gsi isch und es Cupli
)Ich han i dere Ziit (sind glaub öppe 1.5 Stund gsi oder so) mini Rundene im
Spitalzimmer dreit zum d Wehe no meh arege. Das hät dänn au klappet und ich
hans dete scho biz schmerzhafter gspührt. Isch aber no guet ushaltbar gsi.
Zwüschedure isch immer d Hebamme wieder cho und hät d Herztön kontrolliert.
Wo de Beat wieder da gsi isch simmer uf de Gang no biz go hi und här laufe
und au det isches stärker worde.
Am 12i hämmer dänn agstosse im Zimmer und biz Führwerk glueget durchs
Fenster. Isch no speziell gsi so zwüsched de Wehe astosse.
Nach de eis isch dänn d Hebamme cho und hät de Muetermund untersuecht und er isch fängs
uf 1.5cm verchürzt gsi. Das heisst no wiiit devo entfernt dass s Chind bald
würd cho.
Sie händ mer dänn es Schlafmittel geh und de Beat isch mal hei zum biz
schlafe.
Na toll.............jetz mit em Schlafmittel sind d Wehe dänn plötzlich
heftiger worde und a schlafe isch nüme z dänke gsi. Han dänn bis am 3 öppe
im 3-5 Minutetakt Wehe gha und dänn plötzlich all 1-2 Minute. Und es hät
würklich weh da! Het mer das aso nöd chöne vorstelle wie das isch.
Am 3 isch dänn d Hebi go kontrolliere und hät gseit es sig 1cm
offe.........na toll............das het für mich gheisse witeri 8-9 Stund
Wehe well ja de Muetermund 1cm pro Stund sich öffnet.
Sie hät mer dänn es Schmerzmittel geh und gfrögt öb ich id Badwanne well go
entspanne und das han ich dänn welle.
Am 4.15 bini dänn id Badwanne und det sind d Wehe dänn würklich fast nüme
zum ushalte gsi. Zerscht wär ich am liebste grad wieder usem Wasser use, han mich dänn glich andersch entschiede.
Uf eimal han ich dänn s Bedürfnis gha zum presse und han de
Hebamme das gseit und dänn wo sie kontrolliert hät seit sie erstunt dass sie
s Chöpfli gspüri und d Muetermund ganz offe seg und mer doch besser em Beat
sölled alüte wells jetzt richtig los göch!!!
Ich bin huere erstunt und doch au erliechteret gsi, welli gwüsst han das jetze endlich es
endi in Sicht isch und mir eusi Tochter bald chönd id Aerm schlüsse.
Ich han dänn versuecht die erschte Presswehe so guet wies gange isch z verschnufe und han de Hebamme gseit sie söll em Beat nomal alüte öb er scho unterwägs sig. Han würkli Angst gha dass er d Geburt verpasst.
D Hebamme hät dänn nomal tastet und gseit sie gspüri jetzt d Fruchtblase, well sie aber nöd ufmache wells suscht ganz schnell chön ga und de Beat ja nonig da gsi isch.
Oeppe viellicht 10 Minute spöter isch er küchend azspurte cho und d Hebamme hät dänn d Fruchtblase gsprengt und hät mir gseit ich söll jetzt bi jedere Wehe kräftig mitpresse.
Das isch am Afang gar nöd so liecht gsi, well wänn mer presst duets logischerwiis no meh weh als ohni und irgendwie han ich au nöd gwüsst wie oder wohii presse. Sie hät dänn gmeint ich söll suscht us de Wanne use und mal s Bett usprobiere zum presse, well mer det anderi Positione chan ineh. Das han ich aber überhaupt nöd welle, well d Vorstellig zwüsche de Wanne und em Bett e Wehe z becho han ich ganz schlimm gfunde. Han mir dänn dänkt "was sölls" weh duets sowieso und es söll jetz ändlich verbii sii und han mit voller Kraft presst.
Das isch anschiinend richtig gsi dänn d Hebamme hät bereits die schwarze Haar gse! (JUHUIIII sie hät Haar)
De Beat hät bi jedere Wehe tatkräftig mitpresst hät er mir nachane gseit, ich han das aber zu dem Zitpunkt gar nöd richtig mitbecho.
Ich dänke nach öppe 6 Presswehe isch sie dänn da gsi. De Beat hät ghület und ich bin nudelfertig und froh gsi, dases verbii gsi isch.
Ich bin dänn us de Wanne use und übere ufs Bett und han dänn eusi Kira uf de Buch becho und mir händ eus chöne afange känne lerne. Es unbeschriiblichs Gfühl de chli Pfupf endlich z gse. Ich han sicher öppe 100x gseit "sie isch soooo schön" und das finded mir immerno.
So im Nachhinein betrachtet würd ich gern d Geburt nomal "bewusster" erläbe. Es isch zwar s schmerzhaftischte wo ich je erläbt han, aber mit Abstand au s iidrücklichschte, spannendschte, speziellschte und schönste Erlebnis und ich döf glaub säge, dass ich e Traumschwangerschaft und e Traumgeburt gha han.
